WINDHOEK - Presidente Hage Geingob okwa egulula pambelewa oshituthi shomauliko giipindi moBotswana shedhina Ghanzi Show mOlyomakaya ga zi ko moshilongo omo tuu moka.
Pethimbo ndyoka Geingob ta egulula pambelewa oshituthi shika okwa hokolola kutya Botswana naNamibia oye na uukuume wa pama na omolwaashoka a pewa ompito komupresidente Mokgweetsi Masisi opo a patulule oshituthi shika oshitimvo 45th.
Geingob okwa hokolola kutya oshituthi shika osha tameka oshi shona lela ashike ngashingeyi osha koka lela.
“Tango tango oshali ashike omaulikilo guunamapya nuunimuna, ashike monena osha kwatela mo iikwamaliko, shono tashi gandja uumbangi kutya iinima oyindji yomaludhi ga yooloka, ya za miikondo ya yooloka ngashingeyi otayi ulikwa moshilongo shika,” osho a hokolola ngaaka.
Okwati kutya oku uvite etumba oshoka ye okwa hiywa a patulule oshituthi shoka pethimbo ndyoka Namibia naBotswana ya pekaapeka oompito oompe dhomalongelo kumwe. Geingob okwa hokolola kutya omaulikilo giipindi ngaka ohaga gwedha nokutamununa omahumo komesho meliko lyoshilongo.
Okwati onkee Ghanzi Show sho nduno a totwa okwa tamununa omutungilo shoka oshili tashi taambulukwa ko na otashi fuula.
“Ondilwete kutya nonando okuna oshikukuta oshinene sha etithwa komalunduluko gonkalo yombepo, aanafaalama yaGhanzi oya ulika lela kutya oya sindana oshoka otaya hupu nokukokitha oongeshefa dhawo, moka tulye ni atushe ni oombangi,” osho a ti ngaaka moshipopiwa she pethimbo ndyoka a li ta popitha engathithi enene moshilongo shopuushinda. Omutse gwoshilongo Namibia okwa hokolola woo tati kutya ka kele, kokula Ghanzi e shiwike nawa mokukala e na oonyama dhina ongushu, oshilongo shika oshi na woo ondjila yo kOkavango delta, eshala ndyoka li shiwike nawa oomolwa ehala lyomapashiyono lyoCentral Kalahari Game reserve shoka shili unene ethikilo lyaatalelipo yaNamibia mboka haya zi muuyuni.
Botswana naNamibia oye na omakwatathono longelo kumwe ogendji moka Geingob a totha mo ekwatathono li na sha niiyamakuti ya gamenwa ndyoka tali ithanwa Kalahari Transfrontier Park na Kavango, Zambezi Transfrontier Conservation Area (KAZA).