WINDHOEK –Omupresidente gwoshilongo Hage Geingob okwa lombwele elelo lyondoolopa yaWindhoek kutya omahala ngoka kage li pambelewa ga ze po nomukalo ngoka tagu kandulapo onkalo yawo.
Geingob ndhika okwe dhi popi mEtiyali lyoshiwike shika sho a tokola kutya onkalo yoombashu nayi kale oshinima shopaulumompumbwe opo shi kale sha kandulwa po meendelo ngaashi tashi vulika.
Oshigongi shika unene osha li shokuhokola omatokolo ngoka ga li ga tokolwa koshigongi oshitiyali shevi moshilongo shoka sha li sha ningwa omvula ya zi ko.
Omupresitende okwa hokola kutya epangelo nali tale ko oshinima shika neho lyolukeno opo ashike omukundu nguka gu kandulwe po moomapadhi oontalala.
Oshigongi shika osha li sha enda kaaleli ngaashi omukuluntupitithi gwelelo lyondoolopa yaWindhoek Robert Kahimise , Mayola gwaWindhoek Muesee Kazapua , noshowo ookansela yelelo lyaWindhoek, Minista gwomapendulepo gwoondolopa nuushayi Peya Mushelenga, omuprima gwoshilongo Saara Kuugongelwa-Amadhila noshowo Omukalelipo gwopaveta gwepangelo Albert Kawana okutotha mo ashike yamwe yoomaaleli mboka ya ende oshigongimutumba shika.
“Ipula ashike onkalo yomuntu mukweni a tala iinima ye e yi longa tayi pile mombashu.
Omahodhi ngoka omuntu ngoka ta lili itaga hokitha otaga uvitha nayi. Nando ongame itandi vulu okutala omuntu ta lili molwonkalo ndjoka, osho omupresitende a hokola ngaaka.
Okwa gwedha ko kutya onkalo ndjoka nayi ungaungwe nayo meendelelo ngaashi tashi vulika.
Ngoloneya gwoshitopolwa shaKhomas moka omo mu na oWindhoek Laura McLeod-Katjirua okwa holola omadhilaadhilo kutya onkalo yoomoombashu otayi sitha oshoni.
“Ondi wete kutya nonando epangelo olya kondja mpoka tali vulu opu na shimwe shoka tatu ningi onga epangelo kasha li mondjila okukandula po omukundu nguka.
Oshoka ngele owa yi komalukanda ngaka, e to tala onkalo ndjoka aantu yomwenyo ye li, oto kumwa,” osho Katjirua a hokolola ngaaka.
Ashike onda hala ndi yeleke nawa kutya iinima yimwe mbika otayi etithwa komayihumbato gaantu oshoka nonando epangelo olya ningi onkambadhala lyi fale ko uundjugo nena otau ningi ashike omasiku omashona wo otau yonagulwa po nale kaakwashigwana konima yomasiku omashona onkalo ndjoka oya shuna nale kwaandjoka sho pwali ka pu na uundjugo.
Okwa ti ke shi kutya oshike sha pumbwa okuningwa po opo aakwashigwana mbaka ya hulithe po omikalo ndhoka opo yaa ye we ehumokomeho moshipala ngele tashi ya puuwanawa mboka tau falwa kuyo kepangelo.
Okwa holola wo euvo lyonayi kutya aakwashigwana oyo tuu mboka kaye na olune lwokukaleka oshilongo nenge omahala gawo ga yela oshoka ohaya ekelehi ashike iiyagaya shaampoka .
“Oku ekelahi iiyagaya shaampoka otashi etitha oshilongo shi kale sha kaka noshowo uuyogoki wu kale wa pumba pehala mpoka naantu oyo tuu mboka taya ka kwatwa komikithi ndhoka tadhi ende pamwe nekako,” osho a hokolola ngaaka.
Ngoloneya okwa tsikile ko ta ti nokutya okwa li a ka talela po oshilongo Rwanda pehala a li ithanwa Kigali ashike okwa li a fuuka noonkondo oshoka ondoolopa yimwe ya yela noonkondo adhihe.