New Era Newspaper

New Era Epaper
Icon Collap
...
Home / Geingob ota lili Magufuli

Geingob ota lili Magufuli

2021-03-19  Helvy Shaanika

Geingob ota lili Magufuli

Presidente Hage Geingob okwa waimina ounyuni okuulika oluhodi noukwao wananghali molwefyo lomupresidente waTanzania.

Onghela Geingob okwa nyola kepandja laye lokomalungula ta ti: “Tanzania okwa kanifa ofule, omunhu e na ohole noshiwana, naNamibia okwa kanifa mumwaina. Namibia ota hangana pamwe noshiwana shaTanzania moluhodi eli lamumwamememati omuholike, Presidente John Magufuli. Pefimbo eli loluhodi onda hala oku yandja omahekeleko kovakwanedimo laye, nokoshiwana shaTanzania pauyadi. Tulumukwa mombili President John Magufuli.”

Magufuli okwa xulifa mEtitatu moshipangelo moDar es Salaam, nefyo laye ola kolekwa komupedupressidente Samia Suluhu Hassan. Okwa li e na omido 61. Hassan ta ti, oshilongo otashi ka kala meefya oule womafiku 14. 

Ta ti Magufuli okwa xulifa kedengo lomutima, ashike oshikundaneki sho-BBC osha hokolola kutya ovaleli vamwe veengudu domhilameno otava ti omupresidente woshilongo okwa xulifa e na omadidiliko oCovid-19. 

She likolelela kekotamhango laTanzania Hassan oku na okuanifilwa oshilonga shoupresidente meni leevili 24. Oye ta ka ninga omuprresidente wotete omukainhu waTanzania.

Magufuli okwa li umwe womovaleli Ovaafrica ovo va li inava itaveli kutya ocoronavirus oko i li shili. 

Okwa li nokuli ina hala moshilongo shaye mu longifwe omilandu doCovid-19 nokwa li a kumaida oshiwana shaye opo shi litwimikile noihemba. 

Kakele kaGeingob, Omupresidente waKenya Uhuru Kenyatta okwa ti: “onda kanifa kaume kange, omunashilonga pamwe naame, nomuleli oo a li e wete onakwiiwa,” ye ta weda po ta ti Kenya ota patulula pambelewa omafiku aheyali eefya okulila omupresidente woshishiindalongo shaye. 

 Omupresidente mukulu waNigeria Goodluck Jonathan okwa ti Magufuli okwa li “eume lange moudemokoli. Okwa li ependafule li na ohole yoshilongo shalo”.

John Pombe Joseph Magufuli okwa dalwa momafiku 29 October 1959, modoolopa yaChato i li mOnooli-Uninginino waTanzania. Okwe li longela ounongononi, nokwa tameka okulonga onga omulongifikola ta longo ochemistry nomwaalu. Okwa ya mopolitika nokuninga oshilyo shopaliamente mo1995, noshokabinete mo2000. 

Momudo 2015, medalo laye eti-56 okwa anena oshilonga shoupresidente nokwa kala ta lele Tanzania fiyo opefyo laye. 

Magufuli oumwe womovaleli vaAfrica va fimanekwa menenedu molwaashi ihe likwata nokulunga litapula. Ashike ope na vamwe inave mu hafela veudite kutya okwe va kufa omaufemba avo.


2021-03-19  Helvy Shaanika

Share on social media