WINDHEOK-Omwiimbi gwoongalo dhoHip-Hop noAfro Pop, Ndjambi Paulus, a tseyika nawa moongalo nedhina Get Rich, okwa tseyitha ta ka gwitha oyendji kiipundi sho ta ka pititha okavidio ke okape pamwe noalbuma ye ontiyali pehulilo lyomvula ndjika.

Get Rich okwa li a lombwele oshifokundaneki shika ta ti manga omwedhi Desemba inaagu thika, otaka kala a pititha ovidio yongalo yedhina Popular Demand, moka e li takwathelwa kuKalux, omuhikingalo ngoka a li a sindanapo ekopi onga omuhikingalo dhingi moshilongo omvula ndjika.

Get Rich okwa popi ta ti ongalo Popular Demand, oyo yimwe tayi ka kala ya dhenga mbanda, noyi na omulyo gwoongalo tagu inyenge nawa. “Ongalo otayi popi kombinga yegaluko lyandje moongalo, shoka nda thiminikwa kaaholi yoongalo dhandje opo ndi kale nda pititha oongalo oompe, oshoka oye hole oongalo dhandje,” Get Rich ta ti ngaaka.
Okwa gwedha po ta ti okavidio kongalo ndjika otaka ka thanekwa komukwateli gwoongalo dhe komeho gwedhina David Grand, ngoka e li ha thaaneke uuvido dhingi, unene tuu mboka waahikingalo opo taye ya. Ongalo Popular Demand otayi ka kala ehwahwameko lyoongalo ndhoka tadhi ka kala moalbuma yaGet Rich ontiyali.

Get Rich okwa gwedhapo ta ti ye ota ka pititha ishewe oalbuma yedhina My Life, ndjoka tayi popi kombinga yonkalamwenyo ye moongalo. Moalbuma ota ka imba naahikingalo oyendji, nelalakano lyokuhedhitha oongalo dhe pamuthika gwopombanda. 

Get Rich okwa tseyika koyendji nokavidio ke hoka ka li ka piti omvula ya zi ko kedhina Get Rich My Nigger, hoka ka li ka ulikwa koradiomuzizimbe yoNBC osho woo One Africa, moka ishewe Get Rich a li e ka tseyitha kopolohalama yoWhatagwana ndjoka hayi ulikwa koNBC kehe esiku potundi ontine mokati koshiwike.
Get Rich omvalelwa moshitopolwa Oshikoto, momukunda Onandhi, gu li pokati kOnyaanya nOnankali. Omunamino 34 okwa ti okwiimba okwe ku hokithwa kaahikingalo yopondje yiilongo mboka ya kala nokwiimba oongalo dhawo nale ngaashi 50 Cents naJa Rule.

Nonando oyendji opo ashike ya tameke okutseya Get Rich nuumvo, ye okwa ti oongalo okwe dhi tameke nale sho a li a kala moRundu ethimbo ele, okuza 2005, moka a li a tsakanene nakuume ke kopothingo gwedhina Da Silva, ngoka a li omuhikingalo ethimbo ndyoka e taya tameke okwiimba pamwe.

Lwopehulilo yomvula 2005, Get Rich okwa li a tameke nokukwatitha nokuli okangalo ke kotango kedhina My Nigga Let’s Go, moka a li a kwathelwa okwiimba kuDa Silva naEdgar, ashike okangalo inaka ka pita we oshoka ka ka li ka ningwa pamuthika gwopombanda.

Nando ongaaka, Get Rich okwa kala noku ulika uunongo we nongalo ndjika piituthi ya yoolokathana unene tuu mo Rundu noGrootfontein.

Mo2013, Get Rich okwa li a tameke nokukwatitha oalbuma ye yotango yedhina True Story, noya li ya pitithwa mo2016, nuuCD ashike 200.