Victoria Kaapanda

ONGWEDIVA- Opolisi moshitopolwa shaMusati oya manga po omulumentu gumwe sho a adhika nomahooli shaa li paveta momukunda Otjihitwa omutenya gwEtitatu.
Omupopiliko gwopolisi moshitopolwa shaMusati Warrant Officer Anna Kunga okwa ti opolisi oya li ya kwata po omandini ge li 15 kehe limwe lyi na oolitela 25 gongushu N$3750, ga adhika mohauto ndjoka ya li tayi hingwa kunakukwatwa po.
“Omufekelwa nguka okwa li a adhika kee na omukanda gokulanditha omahooli nenge ombapila tayi ulike kutya oku na uuthemba wokulanditha omahooli gomiihauto,” Kunga ta popi ngaaka.
Omulumentu ngoka okwa li ta hingi ohauto yoNissan ndjoka a londeka omandini ngoka gomahooli nokwa holoka mompangulilo yaOutapi ohela, nohauto ye oyi li miikaha yopolisi.
Kunga ta ti oya li ye shi pondola okukwata omufekelwa nguka sho kwa li opolisi yomoshitopolwa shaMusati tayi patololola nelalakano lyokukeelela iimbuluma moshitopolwa.
Nonando omakonaakono oge li metifa natango, opolisi otayi fekele kutya omahooli oge na okukala ga za koAngola.
Omahooli ga za moAngola inaga pitikwa moNamibia oshoka otaku ti inaga dhindwa, go ohaga pungulwa momandoloma ga nika oshiponga go otaga  kakeke ewangandjo nokulandithwa momukalo inagu uka ngele tashi ya kuundjolowelele womuntu.
Omupeviminista gwiikwamina noonkondo dholusheno Kornelia Shilunga omvula ya zi ko, okwa li a gandja omawuyelele nomatompelo gomahooli ngoka kaaga landithwe moshilongo.
Okwa popile ta ti aanangeshefa mboka ye na oombapila dhokulanditha omahooli moNamibia otaya nyenyeta kutya oongeshefa dhawo otadhi shunithwa monima kwaamboka kaye na oombapila okulanda nokukulanditha omahooli okuza  moAngola shoka tashi etitha oongeshefa dhawo dhi pate nokukanithitha aakwashigwana iilonga.