Victoria Kaapanda
Omulumentu gomimvo 35 okwa mangwa po kopolisi moshitopolwa shaZambezi sho anuwa a yi muukongo wiiyamakuti ya gamenwa. Sha ikwatelela kepeko lyopolisi oshiningwanima shoka osha holoka Olyomakaya momukunda Chisao momundhingoloko Mutikitila.
Otaku hokololwa kutya omulumentu ngoka okwa li a adhika nonyama yongalangombe moisikasa ye, konima a li a lopotwa kwaamboka ye mu mono. Opolisi oya ti onyama ndjoka okwa li ya adhika ya tetagulwa noya topolelwa moopalasitika.
Tayi ti, oshipa shongalangombe ndjoka oshowo omiinga okwa li ga monika. Opolisi oya manga po wo natango ondjembo ndjoka kwa li ya longitha okudhipaga oshiyamakuti shoka, oshowo iikuti yi li ihetatu.
Ya ti, ongalangombe ndjoka okwa li yongushu N$9 950. Omugandji gomauyelele muuministeli womindhingoloko Romeo Muyunda okwa kumagidha oshigwana shi hulithe po okudhipaga iiyamakuti ya gamenwa moshilongo.
“Iiyamakuti ngaashi oompanda, oondjamba oshowo oongaka oonkalamwenyo dhawo odhi li moshiponga oshoka oyo unene hayi dhipagwa omolwongushu yiilyo yawo,” Muyunda ta ti ngaaka.
Ta ti, nonande ope na egameno lya kwata miiti okukeelela iiyamakuti yi dhipagwe kaashi li paveta, natango oshigwana ohashi kambadhala okulongitha oompito adhihe, okukonda ooveta ndhoka.
“Otwa ndhindhilike kutya aantu mboka haya dhipaga iiyamakuti ya gamenwa, aanafaalama ye li unene moluhepo taya tumwa kaanangeshefa oshowo oshowo mboka ye li popepi niiyamakuti,” ta fatulula ngaaka.
Muyunda okwa popi ta ti, omumvo gwa yi iipotha yi vule 68 okwa li ya lopotwa mEtosha, moka mwa kwatelwa edhipago lyoompanda, aantu ya adhika nomayinga goompanda, nayamwe ye na omayinga goondjamba oshowo onyama yiiyamakuti yilwe ya gamenwa.
“Aagameni yiiyamakuti momahala ngoka ge na iiyamakuti omumvo gwa yi oya longa nuudhiginini, oshoka omwaalu gwiipotha ya lopota ogwa shuna pevi, ngele tagu yelekwa niipotha yomimvo dha piti,” ta fatulula.
Muyunda okwa indile oshigwana shi longele kumwe nuuministeli wawo oshowo opolisi okulopota iiningwanima yoludhi ndoka.
Ta gwedha po kutya iiyamakuti oyi na okugamenwa molwongushu yawo.
vkaapanda@nepc.com.na