Victoria Kaapanda

ONGWEDIVA - Moshitopolwa shaMusati omwa monika omuntu gumwe e na omukithi gwoCovid-19.  Oshipotha shoka osho shotango moshitopolwa shaMusati sho omunamimvo 29 a li a zi kOmbaye momasiku 12 Juli, nokwa  kala a ikalekelwa mOutapi.
Omukuluntu gwoshikando shuundjolowele moshitopolwa shaMusati Alfons Amoomo okwa ti omukithi ngoka nkene gwa ponekele moshilongo oshitopolwa shika opo tashi lopota oshipotha shotango.
Amoomo ta ti, oya ikalekele aantu yeli 128 kumwe ayehe, nokulaleka aantu ye li 120 nangaashingeyi omu na aantu ye li yahetatu ya ikalekelwa.
“Aantu oyendji oya lalekwa sho ya mana ko omasiku gawo agehe 14.  Mboka ye li momahala gokwiikalekelwa oye li monkalo tayi etitha oonkondo nonande itaya ulike ye na omadhidhiliko gasha,” Amoomo ta ti ngaaka.
Amoomo okwa kumagidha oshigwana shi tsikile oku iyutha koompango ngaashi naana dha tulwa po. Ta ti, ota indile aakeeleli yomaliko ya dhiginine oshinakugwanitha shawo, okushanga omadhina gaamboka taya yi moositola, opo opena kaayi taambathanwe.
Iipotha oya ninga 11 monooli. Oshitopolwa shaShana oshi na iipotha itano omanga Ohangwena yi na nayo iipotha yi li  itano.
Omukuluntu gwoshikando shuundjolowele moshitopolwa shaHangwena John Hango okwa ti ngashiingeyi oye na aantu 16 ya ikalekelwa. 14 oya ikalekelwa mOshikango omanga ye li yaali ya ikalekelwa kEenhana , naantu ye li 317 oya lalekwa. Ayehe kumwe oya li 333. “Aantu ayehe ya ikalekelwa oye li monkalo yi li nawa, noya tegelela ashike ya gwanithe omasiku 14 ga pwe ko ya pewe omayamukulo gawo nenge ya lalekwe,” Hango ta ti ngaaka. Ta gwedhapo ta ti, oshigwana nashi hulithe po okusheka mboka ye li momahala gokwiikalekelwa, itashi ti, ngele omuntu okwa ikalekelwa oku na omukithi gwoCovid-19.
Ta ti  mboka ya monika omukithi ngoka naya simanekwe nokupewa omakwatho agehe taya pumbwa ihe hakatongotongo.
Natango okwa kumagidha oshigwana shi tsikile okukeelela omukithi ngoka nomilandu ndhoka dha tulwa po kepangelo.
“Omukithi nguka otagu keelelwa okutaandala ashike uuna kehe gumwe ta landula nokusimanela omalombwelo nomilandu ndhoka,” Hango a popi ngaaka.
Johanna Haimene gwoshikando shuundjolowele moshitopolwa shaShana okwa ti, iipotha moshitopolwa shaShana oyi li ashike itano, ngaashi ya kala oshiwike sha zi ko.