Victoria Kaapanda

Omunamivo 64 okwa hulithile moshiponga shohauto, omanga aantu ye li yatatu ye li monkalo ombwiinayi moshipangelo shaKatoolika mOshikuku moshitopolwa shaMusati.

Omukuluntu gwopolisi gwoshitopowa shaMusati Titus Shikongo ngoka a koleke oshiponga shoka okwa ti, oshiponga shoka osha holoka Etitatu lwopotundi 14h00 pomukunda Onayizimba momudhingoloko gwaKalongo.  “Ohauto yolwaala olumbulawu yoToyota yiikoto iyali, ndjoka kwa li tayi hingwa komulumentu kee na omukanda, okwa li tayi hingi tayi zi kombinga yOutapi ya uka kOkalongo, omanga ohauto yoToyota Hilux vvti kwa li tayi hingi okuza kombinga yimwe, yi li konima,” Shikongo ta hokolola. Ta ti, sho kwa li ya thiki pomukunda ngoka Onayizimba, ohauto ndjoka ya li komeho okwa li tayi ziko kopate, etayi pumwa ko vvti ndjoka ya li konima, ndjoka ya li yagalangata ko kopate. Shikongo ta ti, omukulupe ngoka a hulitha, oye kwa li ta hingi ohauto ndjoka ya galangata, naantu mboka yatatu ye li moshipangelo oya li mohauto moka. “Ayehe mboka ya li mohauto ya li komeho inaya mona iiponga unene,”Shikongo a popi ngaaka.

Omulumentu ngoka a hulithile poshiponga opo tuu mpoka, okwa tseyika nedhina Itumba  Algerius a yambukile momukunda Onamhindi, mOkalongo.
Omakonakono gwopolisi oge li metifa.