New Era Newspaper

New Era Epaper
Icon Collap
...
Home / Gumwe a si sho kwa li ta hupitha omuniilonga pamwe naye

Gumwe a si sho kwa li ta hupitha omuniilonga pamwe naye

2023-03-14  Victoria Immanuel

Gumwe a si sho kwa li ta hupitha omuniilonga pamwe naye

Omulumentu gwomimvo 31 okwa si eso lyombaadhilila sho kwa li ta kambandhala okuhupitha omuniilonga pamwe naye ngoka kwa li a ihata po.

Sha ikolela kepeko lyopolisi, oshiningwanima shoka osha holoka momukunda Iitatu momundhingolo gOtsandi mehuliloshiwike.

Otaku hokololwa kutya omulumentu ngoka a tseyika nedhina Abrahama Joseph Ndeyanale okwa li ta kambadhala okuyambidhidha omuniilonga pamwe naye ngoka a idhenge po pethimbo lyiilonga yokufula.

Anuwa omuniilonga pamwe naye okwa li a ihata pooha dhomumuthima ngoka kwa li taya the yo nooyakwawo yalwe.

Otaku hokololwa kutya omulumentu ngoka nakusa paife, okwa li a kambadhala okuyambidhidha nakwiihatapo, ashike omupya omunene okwa mbolokotele momuthima moka nokusa omeya.

Ndeyanale okwa li a hulitha ethimbo olyo tuu ndyoka, oshoka kapwa li pe na ngoka ta vulu oku mu hupitha sho a gwile momuthima ngoka gwa adhika gu na omeya.

Ngoka a li a ihata po, okwa li a falwa koshipangelo a ka mone uuhaku. 

Omudhimba okwa li gwe ya okuyuulwa mo konima yethimbo.

Aakwanezimo yanakusa oya tseyithilwa.

Moshiningwanima shimwe inaashi faathana naashika, opolisi moshitopolwa shaShikoto oya manga po omulumentu gwomimvo 32, sho anuwa a li a dhengagula nokukwata kuume ke kopayihole koonkondo.

Otaku hokololwa kutya omukiintu ngoka gwomimvo 26 okwa li a yi a ka talela po kaandja yakuume ke gumwe gwomukiintu, shoka anuwa kwa li sha geyitha kuume ke komiihole.

Omulumentu ngoka anuwa okwa li a dhengagula omukiintu ngoka noongonyo omanga inee mu kwata koonkondo. Otaku tengenekwa omulumentu ngoka anuwa a li a dhengagula omukiintu ngoka molwuukodhi. Opolisi onkene tayi tsikile okukumagidha oshigwana shaa ikuthile oompango momake gawo. Iipotha yomakwatokoonkondo oya indjipala moshitopolwa shaShikoto, shoka natango sha limbilike opolisi moshitopolwa moka.

Opolisi oya ti, oya pumbwa okukutha ko oongaku okugandja omalongo oshowo okukumagidha oshigwana kombinga yomakwato koonkondo.

Oya gwedha po kutya oya ndhindhilike kutya oshigwana kashi na ontseyo ya gwana kombinga yomakwatokoonkondo sho osho shoka taga indjipila nokuholoka kehe esiku.

vkaapanda@nepc.com.com.na


2023-03-14  Victoria Immanuel

Share on social media