ONGWEDIVA - Omulumentu gwomimvo 40 okwa ikutha omwenyo sho a itsu nombele yomokombitha mothingo kombinga yokolulyo, e ta si ethimbo olyo tuu ndyoka.
Omukuluntu gwopolisi moshitopolwa shaMusati Titus Shikongo okwa ti oshiningwanima shoka oshikumithi osha holoka lwopotundi 20h45 yuusiku wEtitano lya zi ko momukunda Okadhiyakoshumba momudhingoloko gwaElim.

Shikongo ta ti kape na uuyelele wa gwana kutya oshike sha etitha opo omulumentu ngoka a ikuthe omwenyo. Nakusa okwa tseyika nedhina Sakaria Itonywa Shongoha a yambukile momukunda omo tuu moka. Otaku hokolwa kutya ina thiga a shanga shoka she mu ikuthitha omwenyo. Shongoha oye gumwe gwomaalumentu ye li yaali mboka ya ikutha omwenyo mehuliloshiwike lya zi ko moshitopolwa shaMusati.
Ngoka natango a idhipaga oye omulumentu gwomimvo 31, a ikutha omwenyo sho i imangeleke nongodhi yolusheno ndjoka a li a tonona moombuli dhondunda ye.

Okwa tseyika nedhina Simeon Ngendina Shituluka, a zile momukunda Omalungu moshitopolwa shaNesi.
Aakwanezimo yawo ayehe oya tseyithilwa nomakonakono gopolisi oge li metifa kutya oshike sha etitha omayikutho goomwenyo ngoka ge li gaali. Shikongo okwa li a kumagidha oshigwana kutya ngele ope na ngoka e na uupyakadhi tawu thiminike omuntu a ikuthe omwenyo nenge e li muupyakadhi ihe oku wete ite wu vulu, na kambadhale a tseyithile kuume ke nenge kehe ngoka ta vulu oku mu kwathela.
Ta ti kape na uupyakadhi ihawu vulu okukandulwa po, okupopya okuvule okumwena.

“Onkundana yokulopotelwa omuntu a ikutha omwenyo oyo onkundana ombwiinayi. Kehe ngoka ena sha tashi munyenyetele neshi popye, nenge na thike popolisi yo yi mu pukulule mpoka e na okumona omakwatho gomeendelelo,” Shikongo ta ti ngaaka.