Omulumentu gumwe okwa mangwa po kopolisi sho ta fekelelwa ekwatokookondo nedhipago lyokanona koomwedhi 22.

Omukuluntu gopolisi moshitopolwa shaMusati Ismael Basson okwa ti oshiningwanima shoka osha holoka Olyomakaya momukunda Omukuku momudhingoloko Ogongo.

Otaku hokololwa kutya olutu lwokanona hoka kokakadhona okwa li lwa adhika megumbo lwa dhengagulwa shi nyanyaleka ko ke na iilalo momutse.

Opolisi oya ti omakonakono ngoka ga ningwa po otaga ulike kutya okanona hoka oka kala momahepeko gokukwatwa koonkondo ethimbo ele.

Tayi ti, oshiningwanima shoka okwa li sha lopotwa kuyinagona. 

Nonando aantu ye li yane mboka haya zi megumbo limwe oya li ya fekelwa nokwa li ya pulaapulwa, omulumentu okwa fekelwa oye a longo oshiningwanima shoka shi nyanyaleka. Moshiningwanima inaashi faathana, aalumentu yaali yomimvo 27 ayehe  oya mangwa po kopolisi moshitopolwa shaZambezi. 

Sha ikolelela kepeko lyopolisi, oshiningwanima osha holoka Etiyali lwopotundi 02h00 pehala lyomanwino tali ithanwa Creation Bar.

Otaku hokololwa kutya aalumentu mboka yaali okwa li ya ponokele omulumentu gumwe noku mu tsa noshinima inaashi shiwika momutse shoka kwa li she mu ehameke noonkondo.

Opolisi oya ti, omulumentu ngoka kakwa li a thiki koshipangelo, okwa li a hulithile mondjila.

Shoka sha etitha enyenyeto pokati kaalumentu mboka yatatu inashi shiwiwka natango.

Nakusa okwa tseyika nedhina Malven Karipi. Aakwanezimo ye oya tseyithilwa.

Opolisi onkene tayi kumagidha oshigwana kaashi ikuthile we ooveta momake gawo, ihe shi kale tashi lopota kopolisi opo yi ye yi kandule po uupyakadhi wuli po.

Ya gwedha po kutya okwi ikuthila oveta momake oku na iilanduli nomageelo, ngoka taga ka yonagula wo onkalamwenyo oshowo onakuyiwa yoye.

Tayi ti, oshigwana nashi ilonge okukondolola oongeyo, oshowo okukutha omatokolo omanga shi li kohi yomalovu.

Opolisi oya ti oya ndhindhilike kutya iikolitha oyo uupyakadhi, iiningwanima oyindji tayi lopotwa ohayi ningwa kaakwashigwana ye li kohi yiikolitha. 

vkaapanda@nepc.com.na