Omukwati koonkondo Sindano Hango ngoka oshipotha she sha undulilwa komasiku 28 Apiilili hoka andola ta ka pewa egeelo lyondholongo, otaka tamaneka oshizemo shompangu.
MuFebuluali, Hango okwa li a monika ondjo moshipotha shekwato koonkondo nokwa kala kondje yondjedhililo sho a ifutile mo noshimaliwa shoN$10 000.
Otaku hokololwa omulumentu nguka a kwata koonkondo omumwayinagona noku kambadhala oku mu futa andola e mu mweneka niimaliwa, muKotoba 2014.
Ashike ngashiingeyi Hango okwa gandja omishangwa kOmpangu ya shiga ko moshilongo (Supreme Court) ta ti ompangu yopombanda (High Court) mOshakati oya ningi epuko sho inaayi itaala uumbangi we kutya okwa yile momilalo nomukiintu ngoka papitikilo, nokwa monika ondjo kohi yokatendo hoka ke li ompinge nomahepeko gomomagumbo komomumvo 2000.
“Otatu ka gandja kompangu kutya sha ikololela koveta yoshilongo shetu ezimino sigo oompaka olyo eipopilo moshinima shekwatokoonkondo,” osho omishangwa dha gandjwa kompangu ya shiga ko dha ti.
Hango ta ti ompangu oya ningi ishewe epuko sho ya ti epangelo ndyoka lya kalele po nakukwatwa koonkondo olya gandja uumbangi itaau vulu okupatanekwa.