ONDANGWA –Sho omasiku taga ende taga iyadha okuuka kesiku lyokuhogolola kansela gwoshitopolwa shOndangwa sha kwatela mo ondoolopa, oshilyo shongundumutima yoSwpo sho oshi li wo Omupevi-presidente gwoshilongo Nangolo Mbumba osha goyo ko komahwahwameko noshigongi oshinene, eshi ningile mOndamgwa ehuliloshiike lya yi.

Sho a popitha aakwaSwapo naasihenda yongundu mOndangwa, Mbumba okwa kunkilile aahogololi opo anuwa yaaha hogolole oongundu dhoompilameno nenge ookandidaate dhiithikamena. 
Ta lombwele oshigwana kutya nonande ongundu yoPDM ya shendja edhina okuza koDTA, onkene ngaa yi na omalwaala gongundu ndjoka ya kala tayi longele kumwe nepangelo lyokatongotongo ndyoka lya kala nokukolonyeka oshigwana ethimbo nuule.

“Nande oya shendje edhina, nonatango yo oDTA, kamu wete omalwaala gawo,” Mbumba ta ti.
Ta gwedha po ishewe kutya omuhogololwa i ithikamena ke na nande ondjokonona yokulongela oshigwana uuwanawa washa nomolwaashoka ta gandja omauvaneko nogiinima mbyoka itaayi vulu okuningwa. 

Omupevipresidente ta kumagidha Aandangwa opo ya ka hogolole omuulikwa gwoSwapo, Leonard Negonga, ta ti Negonga ina fa aaulikwa hogololwa yalwe mboka ye li koongundu dhoompilameno nenge yi ithikamena po mboka ina yi ikolelela nande okosha. Ta ti omauvaneko taga ningwa kaantu mboka ogo osima yowala shaashi kaye na omidhi dhasha yo ishewe kaye na iiyimati taya vulu okutalika.

Mbumba sho a thikamitha Negonga komeho yaakwashigwana mboka ya li ye ya koshituthi okwa ti, omuulikwa nguka okushiwike nawa oshoka okwa li nale meya gondoolopa yaNdangwa noku na iiyimati ya yela, okupitila moopoloyeka ndhoka dha gwanithwa po pethimbo a li melelo lyondoolopa.  

Okwa pula mboka taya ka hogolola ongula opo ya longekidhe uumutse wawo womahogololo nena. Ta ti aahogololi naya kale ye li mombepo yi li nawa, inaya nwa omangandja opo ya ka hogolole shi li mondjila. 
Mbumba okwa kunkilile mboka ye li pethimbo lyokuhogolola noye li aakalimo moshitopolwa shondoolopa yaNdangwa opo ya se oshimpwiyu kutya oya hogolola opo ya kale ye na ewi noye na uuthemba oku pula ngoka ya hogolola uuna itaa longo ngaashi sha tegelelwa koshigwana.