Victoria Kaapanda

ONGWEDIVA - Aashingithi yiilandithomwa momawuliko giipindi mOngwediva oya gandja omanenedhiladhilo gawo opo omangeshefelo ga ende nawa unene ethimbo ndika lyegwopevi lyoshimaliwa.

Oya popi taya ti aalongekidhi yomawuliko giipindi oya pumbwa okuninga elunduluko ngele tashiya pofuto yopomwelo, oshoka ookasitoma dhawo dhimwe odha patelwa pondje dho dhimwe dha patelwa meni.
Oshoka  ngele  omuntu gumwe ta futu N$ 20 ndjoka yokuya meni pomwelo nena ita vulu we okuza mo a ka longe ilonga ye  yilwe, ye a galukile mo oshoka oku na okufuta kehe ethimbo ta shuna mo.

“Nena ngele omuntu okwa hala okushuna mo lutano mesiku oku na okufuta ethele? Ondi wete sha puka oshoka otaya shololitha ookasitoma dhetu, aantu yamwe oya longitha nale oolefa okuya kehala yo otaya futu  pomweelo ishewe  otwa tegelela ye ye ye tu sapote ishewe meni,” gumwe gomaashingithi ta ti ngaaka.
 Ta gwedhe po ta ti shapo na ya tule po uumbapila wokiikikeho esiku kehe, mboka tawu ulike kutya omuntu okwa futa esiku ndyoka nenge okatekete, nongele  ka kana esiku ndoka opo ngeno ke na okufutululwa.

Selma Ileka ngoka ha landitha iikunwa niikulya ya yoloka, okwa ti ye oha kutha ombinga omvula kehe, ihe ke shi wete ngele omvula tayi ya ota kutha ombinga oshoka okuwete kutya okwa kanitha oshindji.
“Oku na ashike omasiku ge li gaali omawulko giipindi ga hule, ihe sigo onena inand itekulula oshoka iikunwa yandje oya uudha ashike eeyisikasa, iikulya oyo ngaa te ti hwepo shaashi otayi ende ngaa hwepo,” Ileka ta ti ngaaka.

Okwa gwedha po tati okwa longitha iimaliwa yi thike poN$15 000 kumwe, neyinekelo ngeno a ze mo niimaliwa yi vulithe poN$30 000 opo anuwa a ka thitike oombululu mpoka a kuthile oshowo a mone oshimaliwa shoku ikwathela.

Oyendji taya shingitha momawuliko giipindi mOngwediva oya li ya gandja omakemo gawo, kutya omangeshefelo itaga ende nande nawa ngaashi shito, taya popi kutya egwopevi lyoshimaliwa olya shunitha iilandithomwa yawo monima.

Omawuliko giipindi oga tamekele momasiku 23 notaga hula momasiku 31 Aguste nuumvo.