New Era Newspaper

New Era Epaper
Icon Collap
...
Home / Iilando mbyoka yi na ondilo muuyuni

Iilando mbyoka yi na ondilo muuyuni

2019-03-22  Staff Reporter

Iilando mbyoka yi na ondilo muuyuni

Paris, oshilandopangelo shaFrance, osho sha kangela iilando iikwawo muuyuni ngele tashi ya kondilo, yi li ontega naHong Kong osho wo Singapore. Osho oshikando shotango iilando itatu tayi topolelathana ehala limwe mondjokonona yuule woomvula 30 dhomapekaapeko ngaka haga kwatelwa komeho koEconomist Intelligence Unit ndjoka hayi yelekanitha iilando 133 muuyuni.
Oshilandopangelo shaFrance, shoka sha li ponomola ontiyali omumvo gwa zi ko -  oshi li shimwe shomiilando yaEurope ine yi li meni lyomulongo. Omapekaapeko ohaga yelekanitha ondando yiinima mbyoka hayi ya ha konyala kehe pamwe, ngaashi ondando yomboloto miilando 133.
Ohayi shiike nduno ngele oondando odha ya pombanda nenge pevi moka haye dhi yelekanitha noondando dhomahupilo moNew York, ndjoka hayi longithwa onga omuthika gwoshiyelekanitho.
Omushangi gwolopota ndjika Roxana Slavcheva okwa ti Paris  osha kala shimwe shomiilando mbyoka yi na ondilo muuyuni okuza mo2003 nosha li shi li tashi pula mondjato lela okukala omukalimo gwaamoka.
“Iikolitha, iiyenditho osho wo omakaya oyo ashike iinima yi na ongushu yiimaliwa yi thike pamwe okuyelekanitha niilando iikwawo moEurope,” ta ti ngaaka.
Konyala ondando yokukululwa kwaakiintu, ongoshiholelwa, otayi kotha US$119 moParis, okuyelekanitha noU$73.97 moZurich noUS$53,46 mOsaka, oshilando shoka shi li moJapana.
“Iilando yaEurope otayi monika oyo yi na ondando yi li pombanda ngele tashi ya kiilongithomwa yomomagumbo, uuyogoki, omainyanyudho osho wo omahala gwomainyanyudho- moka Paris e li omukalelelipo omwaanawa moshimpungu shika,” Slavcheva ta ti ngaaka. 
Omusholondondo gwiilando mbyoka yin a ondilo muuyuni:
1. Singapore (Singapore)
1. Paris (France) 
1. Hong Kong (China)
4. Zurich (Switzerland)
5. Geneva (Switzerland)
5. Osaka (Japan)
7. Seoul (South Korea)
7. Copenhagen (Denmark)
7. New York(US)
10. Tel Aviv (Israel)
10. Los Angeles (US)
Sho wo ongushu yoshimaliwa tayi tengaatenga oya kwathela mokweeta omalunduluko nuumvo, moka iilongo ngaashi Argentina, Brazil, Turkey naVenezuela ya mono omalunduluko omanene momusholondondo gwomahupilo gaakwashigwana. 
MoCaracas shaVenezuela, moka oondando dhiinima dha li dha yi pombanda konyala noopelesenda 1 000 000 omvula ya za ko moka sha li sha thiminike epangelo lyi ye po noludhi lwoshimaliwa lwi ili, noshi li osho oshilando shi na ombiliha nuumvo. Damascus shaSyria osho sha landula ko mombiliha.
Iilando omulongo mbyoka yin a ombiliha muuyuni
1. Caracas (Venezuela)
2. Damascus (Syria)
3. Tashkent (Uzbekistan)
4. Almaty (Kazakhstan)
5. Bangalore (India)
6. Karachi (Pakistan)
6. Lagos (Nigeria)
7. Buenos Aires (Argentina)
7. Chennai (India)
8. New Delhi (India)
Hong okwa galukila ponomola yotango onga oshilando shoka shin a ondilo muuyuni kaakwiilongo mboka haya longele moka. Oshilando shika shomatungo omalekaleka osha li shi iyadha ponomola ontiyali omvula ya zi ko, sha li sha landula oshilandopangelo shaAngola, Luanda. Ashike osho tashi pangele ngashingeyi momusholondondo ngoka gu na iilando oyindji yaAsia, shi ikwatelela komapekaapeko oma-24 gokutala ondando yomahupilo ndjoka ya ningwa kehangano lyoMercer. Omapekaapeko ngaka ohaga tala kondando yomagumbo, iikutu, osho wo omboloto nombiila.
Ohayi konakona iinima yi li 200 moshilando kehe mwa kwatelwa olukalwa, iiyenditho, iikutu, iikulya, omainyanyudho, moka haya yelekanitha oondando ngaashi dhuutekete wokutala uufeelema, oondjiina, oliitela yomeya, okoofi, olitela yomahooli osho wo olitela yomahini.
Mercer ota fatulula aakwilongo onga aaniilonga yehangano mboka ya tumwa ya ka longele koshilongo shilwe shaaa shi oshilongo she uule wethimbo lyontumba. Momusholondondo gwonuumvo, Tokyo oye e li puutiyali, a landulwa kuZurich naSingapore, omanga Seoul e li puutitano. Shika osha hala okutya ine yomiilongo itano mbyoka yi na aakwiilongo taya longele moka yi na ondilo oyi li moAsia, shi ikwatelelea komakonaakono. Okuza puutitano, okwa landula Luanda, Shanghai, N’Djamena, Beijing naBern e li puutimulongo.
Oshilando muuyuni shoka shi na ombiliha kaakwiilongo taya longele mo oTashkent, shi li ponomola 209 momusholondondo gwiilando yi na ondilo, nosha landulwa kuTunis naBishkek.
Mercer oha longitha New York onga omuthika okuyelekanitha oondando yonkalamwenyo miilando iikwawo, noha mete einyengo nelunduluko lyiimaliwa ta yelekanitha nodola yaAmerica. Ongo shizemo, enkondopalo epe lyopaunda okuyelekanitha nodola olya eta London i inyenge oonkatu 10 okuya sigo oponomola 19 momusholondondo.
MoBritain, Birmingham okwa inyenga oonkatu 19 okuza omvula ya zi ko a ya ponomola 128 omanga Belfast a ya ponomola 152, a londa oonkatu 18. Aberdeen oku li po134.
Iilando yomuuninginino waEurope oyindji oyi inyenga. Frankfurt (68) naBerlin(71) oyi inyenga noonkatu 49 naMunich (57) a katuka oonkatu 41.
Iilando yilwe mbyoka yi inyenga omwa kwatelwa Paris (34), a ya pombanda oonkatu 28, Rome (46), a ya pombanda oonkatu 34, Madrid (64th), pombanda noonkatu 47 naVienna (39) i inyenga noonkatu 39. Moscow (17), St. Petersburg (49) naKiev (173) ayihe oya kuluka momusholondondo okuyeleka nomumvo gwa piti. -BBC


2019-03-22  Staff Reporter

Tags: Khomas
Share on social media