Omukuluntu gwopolisi moshitopolwa shaShana Naftal Lungameni Sakaria okwa ti okwa nyanyukwa kiimbuluma mbyoka ya shuna pevi moshitopolwa nonando aalongithi yoondjila ya kondo oompango omanga kwa li ya londodhwa. 

Aalongithi yoondjila ye li 64 okwa li ya mangwa po pethimbo lyomatango omanene, omanga ye li 1 924 ya li ya pewa uutekete wokwaaihumbata nayi moondjila oshowo okwaagwanitha po oompango nomandhindhiliko gomoondjila, wongushu N$1 885 925. 

“Omumvo gwayi okwali twa popi okupitila miikundaneki ya yooloka oshowo okugandja omalongo moshigwana nkene oshigwana shina okwiihumbata okuyanda omaupyakandhi pethimbo ndyoka lyomatango omanene,” ta popi ngaaka. 

Aalongithi yoondjila okwali ya londodhwa kaaya hinge yeli kohi yiikolitha oshowo ya simaneke omandhindhiliko gomoondjila okukalekapo elandulathano moodjila. 

Aapolisi okwali yalongo nuudhiginini okukalekapo oshowo okukwashilipaleka kutya ayihe mbyoka oya landulwa noku simanekwa. 

“Mboka kwali ya mangwa omboka kwali ya kondo oompango, ngaashi kwali naana ya londodhwa,” ta ti ngaaka. 

Mboka yali natango yakwatwa po pethimbo ndyoka, aashingithi momahala gomanwino, sho kwali ya kondo oompango oshowo ethimbo lya pitikwa komikando dhawo dhoku shingitha. 

“Pethimbo ndika otwa tegelela mboka kwali ya yi komafudho oshowo mboka taya shuna, ya longithe oopate, onkene oondjila otandhi kala dhuudha. 

Ota tu kumagidha oshigwana shi longitho wo oondjila nuukeka,” ta kumagidha ngaaka. 

Sakaria okwa pandula iimbuluma ya shuna pevi pethimbo lyomatango okuyeleka nethimbo ndyoka sho ka kwali lya thiki. 

“Otwa lopotelwa omagumbo ga teywa mpeya na mpeya, nuunene momindhingoloko dhokOndangwa. 

Aapolisi oya kala taya patolola omapandaanda oshowo okuhadha oohauto pethimbo ndyoka,” ta ti ngaaka. Ta ti, elalakano okukalekapo ombili ne landulathano moshitopolwa shaShana onkene otaya tsikile okulonga nokugamena oshigwana naakalimo yawo. 

vkaapanda@nepc.com.na