Ethimbo ndika lyomatango omanene oyendji ohaya ka talela po aakwanezimo yawo okuza kiitopolwa ya yooloka yoshilongo.
Iiponga yomoondjila ohayi holoka nohai faalele oomwenyo dhoyendji, ihe shoka ohashi holoka uuna aahingi yiihauto itaaya landula nokugwanitha po oompango dhomoondjila.
Oomwenyo dh ili 18, odha faalelwa miiponga ya holoka, kuumbangalantu oshowo kuumbugantu wOkahandja moshitopolwa Otjozondjupa koongulasha dhOlyomakaya.
Sha ikolelela kepeko lyopolisi, okabetsa okashona oka li ki idhenge mumwe niihauto iiikwawo mbyoka ayihe ya li ya hwama omulilo nokupya pyo thiluthilu.
“Aafaalelwa oyendji miihauto moka oya li ya pi po komulilo, omanga ye li ya tatu ya ningi aanelago sho ya hupu, “ tayi hokolola ngaaka.
Opolisi oya kumagidha oshigwana tashi longitha oondjila oonde, ya hinge nuukeka.
“Ethimbo ndika iiponga ohayi holoka unene, noomwenyo dhAanamibia oyendji ohadhi faalelwa, “ tayi ti ngaaka.
Tayi kumagidha aahingi yiihauto ya hinge nethimbo, oshoka anuwa okuhungilila itaku ti okuthika.
“Omandhidhiliko goomondjila naga simanekwe opo ku indikwe iiponga. Shingeni nawa”, ta kumagidha ngaaka.
Aantu mboka oya si eso lyi nyanyaleka sho ya pile miihauto moka.
Otaku hokololwa kutya aantu mboka kwa li ya thiki po tango, kakwa li ye na sho taya vulu okukwathela nasho, oshoka omulilo okwa li gwa hwama unene.
Caption: Oshiponga oshinene sha holoka pokati kOkahandja nOtjiwarongo sha faalele oomwenyo 18.