New Era Newspaper

New Era Epaper
Icon Collap
...
Home / Iiponga yiihauto 67 nomaso gahetatu moshiwike shimwe

Iiponga yiihauto 67 nomaso gahetatu moshiwike shimwe

2022-09-06  Victoria Immanuel

Iiponga yiihauto 67 nomaso gahetatu moshiwike shimwe

 Aantu ye vulithe puyahetatu oya si, ye li 117 oya mono iiponga momakandomo goohauto geli 67, mbyoka ya ningwa muule womasiku gayeheyali. 

Iiponga mbyoka oya holoka ashike okuza momasiku 28 Aguste sigo ga4 Sepetemba nuumvo. 

N d h o k a o d h a p o p i w a komunambelewapitithi mehangano Motor Vehicle Accidents (MVA) fund, hali ungaunga niiponga yomoondjila Abner Kuume Itumba, mepeko lyopolisi lyiiningwanima hayi holoka mehuliloshiwike, ongula yOmandaaha. 

Natango okwa lopotwa oshiningwanima shi nyanyaleka shoka sha faalele oomwenyo dhantu yatatu ongulohi yOsoondaha moshitopolwa shaShikoto. 

Otaku hokololwa kutya aalumentu yane, okwa li ya londa mohauto yoHonda yu uka koTsumeb sho kwa li yi idhenge mumwe nokaloli okashona, omutse nomutse. 

Opolisi oya ti, aalumentu yatatu mwa kwatelwa omupolisi gumwe okwa li ya sile poshiponga omanga aahingi yoohauto ayehe yaali ya li ya hupu. 

Taya ti, ngoka a li ta hingi ohonda okwa li a mono oshiponga kashona omanga ngoka kwa li ta hingi okaloli kakwa li a mona oshiponga nando. 

Opolisi oya ti kape na natango uuyelele kutya oshiponga shoka okwa li sha holoka lela ngiini. 

Okwa lopotwa woo oshiponga shimwe shoka sha holoka pokati kOshikango nOdibo, ihe Itumba ka li ta vulu oku shi koleka. Okwa ti olopota yoshiponga shoka inayi mu thika natango. Shika osha hala kutya omiyalu dhiiponga odha pita po piiponga 67 mbyoka ya lopotwa. 

Itumba ta ti, iiponga oyindji yomwaambyoka ya holoka, oya etwa kaantu itaaya gwanitha po ooveta dhomoondjila. Ta ti yamwe yomiihakanwa aayendi yokolupandhi mboka ya lyatwa kiihauto. 

‘’Thimbo limwe aantu yamwe oto adha taya taaguluka oopate inaaya tala koombinga adhihe. Ano iiponga oyindji otayi etithwa wo komayihumbato gaantu,” ta ti ngaaka. 

Ta gwedha po ta ti, oya ndhindhilike kutya aahingi yamwe oto adha ya londeka iiti, mohauto yiitenda, ihe kombanda hoka okuna aantu ya londa ko, shoka sha nika oshiponga. 

“Oto adha aahingi yamwe natango taya londoke aantu omanga ohauto kopate inaayi za ko nawa, shoka tashi vulu natango oku eta iiponga,’’ ta popi ngaaka. Ta ti, iiponga yomoondjila mbyoka tayi popiwa hayo ashike mbyoka, ihe iiponga yiihauto uuna ohauto ya gu elola ohauto tayi kondama. 

‘’Otatu kumagidha oshigwana shi simaneke omandhindhiliko agehe gomoopate, okuyanda iiponga yi holeke oshowo okukanitha oomwenyo dhaantu,” ta kumagidha ngaaka. 

Itumba okwa kumagidha wo natango oshigwana shi hulithe po okulopotela ookansela, oongoloneya nenge aakuluntusikola uuna oshiponga sha holoka, ihe nashi ndhenge konomola 9682. 

Ta ti, onomola ndyoka oyo nayi kale tayi ndhengelwa uuna oshiponga sha holoka moondjila, opo ku gandjwe omayakulo gomeendelelo. 

vkaapanda@nepc.com.na 


2022-09-06  Victoria Immanuel

Share on social media