New Era Newspaper

New Era Epaper
Icon Collap
...
Home / Inandi tila okulela oshilongo: Nandi-Ndaitwah

Inandi tila okulela oshilongo: Nandi-Ndaitwah

2024-05-15  Correspondent

Inandi tila okulela oshilongo: Nandi-Ndaitwah

Omuulukwa presidente wongudu yoSwapo Netumbo Nandi-Ndaitwah okwa koleka elilongekido laye oku lela Namibia ngeenge okwa di mo mohoololo oo taa ka kala ko muNoveba2024.


Nandi-Ndaitwah edi okwe di popya pefimbo a li ta popifa oilyo yongudu yoSwapo pomashakeneno eendjila pokati ko Tsumeb naGrootfontein eshi ta di koinyangadalwa ya li kOkongo nokOpuwo mOsoondaxa.

“Ondi shishi kutya itashi ka kala shipu. Ouleli kaufi oshinima shipu oohailwa vange... Efimbo limwe ohatu nyengwa nokeefamili detu, efimbo limwe ouna ashike epata lovanhu ve li 10, dilaadila nee kutya otashi kala ngahelipi oku lela oshilongo ashishe. Ashike onda dimbulula kutya inandi pumbwa oku tula omutwe kepepe shaashi ohandi longo nOvanamibia,” ta ti ngaho.

Nandi-Ndaitwah ta fatulula kutya oha longo nale nOvanamibia va dja komihoko dayooloka, ovo ve na omaukwatya nomifyuululwakalo dayooloka. Ta ti omihoko nomifyuululwakalo nadi kale odjo yoku tula kumwe eshiivo shaashi ngeenge ei oya tulwa kumwe, otai ka kala eenghono doshiwana. 

 “Inatu longifa omihoko opo tu li tongole... Keshe umwe okwa hala oshipambu shoshikuki. Ame inandi tila oku lela oshiwana. Onghene ngeenge handi popi oinima, ondi shi eshi handi popi, nohandi ningi osho handi popi,” Nandi-Ndaitwah ta ti.

Omuulikwa presidente ta weda po yoo kutya ye melilongekidilo laye loupresidente ina hala oku lela oshiwana shatukauka, sho shihe na elandulafano nelongelokumwe sho ina shi itavela mu‘kamekela kakasa’. 

“Ohatu foloma po Namibia oo twa hala, naashi otashi dulu okuningwa. Haame handi ke shini nga... ohandi ka kala po ashike onga omukwatelikomesho... Ngee oshe uya koku longa peniwe oshinakuwafifwa... Efimbo limwe ohatu udu oshimaliwa sha shunwa ko koshikefa shepangelo meembelewa mwafa mu he na Ovanamibia ovo tava longo meembelewa, onda hala mwa lombwela nge kutya ovanhu ava nandi va ningi ngahelipi opo va longe onga ovanhu ve na oshinakuwanifwa. Ohandi ka twa kumwe nanye - she li kolelela komayele oo tamu ka pange,” ta ti ngaho.

Nandi-Ndaitwah okwa weda po yoo kutya ovanhu nava pulwe oinakuwanifwa vei pewa ngee inai wanifwa po, naavo va pewa oshinakuwanifwa shouleli inava kala ashike tave li dilaadila voo vene, ashike nava dilaadile Ovanamibia avashe pauyadi opo ku etwe po oufikepamwe. Kakele kokushakeneka ovayambididi vomoTsumeb noGrootfontein, Nandi-Ndaitwah okwa shakena yoo novayambididi noilyo yoSwapo yomOtavi moshitukulwa shaOtjozondjupa mopate yoB.

 -Nampa 


2024-05-15  Correspondent

Share on social media