Iihakanwa oyindji mbyoka ya li ya hupa oya li ya taalele omahepeko nokulombwelewa kutya kape na esiku ya mone oofamili dhawo kwaamboka ya li ya hala oku ya landitha po, Interpol tayi ti ngaaka. Oya za kiilongo yokuuninginino waAfrica mwa kwatelwa Benini, Burkina Faso, Niger, Nigeria naTogo. Aapolisi yomiilongo mbika taya longele kumwe noInterpol oya li ya hupitha yamwepo mboka ya li taya longithwa iilonga inaayi uka pomahala mpoka ya li ya thindilwa okulonga onga aalandithi yiihulo noyamwe taya longo momatala gomalandithilo monkalo tayi kenyaneke.
Okanona kamwe oka li ka adhika taka undula ooshako dholushi tadhi vihi ookilograma dha adha po40 pokati koongamba dhaBenin naNigeria, omupopiliko gwehanganbo ta ti ngaaka.
“Aanona oyendji ohaya etwa huka ye ye ya longithwe. Ndhika oongundu dhoombudhi ndhoka dha hala iimaliwa. Kaye na ko nasha nuunona tau thiminikilwa okulanditha po omalutu gawo, taya longo moonkalo oombwiinayi, taya zi momapandaanda, oye na ko ashike noshimaliwa,” Omukuluntu gwoInterpol Paul Stanfield ta ti ngaaka.
Sho pwa ningwa oshikonga shokuhupitha uunona, aantyu 47 oya li ya tulwa miipandeko. Ehangano tali ti.Oshikonga shika sha ningwa uule woomwedhi osha tamekele mo2018 nosha li sha kwatelwa komeho koInterpol tayi longo pamwe naapolisi yomiilongo mbyoka, unene tuu Nigeria Benin, iilongo mbyoka ya ndhindhilikwa kutya omahepeko gaanona oga vuka muyo,
Elanditho lyaantu eshongo enene lya taalela iilongo oyindji yaAfrica, moka aantu omayovi, unene tuu uunona, haya landithwa po ya ye mokulanditha iihulo osho wo iilonga yaa na ondjambi. Uukadhona wu vule 20 000 Uunigeria owa li wa thiminikilwa okulanditha iihulo mookamba dhoomina moMali kaantu mboka ya li ye wu uvanekela iilonga koohotela dhi li koMalaysia, shi ikwatelela kehangano ndyoka hali indike elanditho lyaantu lyedhina National Agency for the Prohibition of Trafficking in Persons ( NAPTIP). Mboka ya hupithwa oya li ya gandjwa momake gaanambelewa moNigeria nomoBenin.
Yamwe oya li ya hanganithwa naavali yawo, omanga yamwe ye li momalukalwa gi ili nogi ili miilongo ayihe iyali.
Uunona 85 owa li wo wa hupithwa moSouth Sudan moshikonga ishewe shimwe shaInterpol koomina dhokawe moKhartoum, moka ya li ya thiminikwa ya longe niilongomwa ya nika oshiponga.
