Ngoloneya gwoshitopolwa ShaShana Elia Irimari okwa ti omimvo 2019/2020 odha nkundipalekwa nomashongo gaali noga taalela oshilongo, ngaashi ondjala, egwo pevi lyoshimaliwa niikwawo oyindji omolwa omukithi gwoCovid-19.
Irimari ndhoka okwa li e dhi popi sho a gandja oshipopiwa shoshitopolwa shaShana ohela.

“Omukithi nguka inagu shunitha ashike oshimaliwa moshilongo,ihe ogwa shunitha ehumokomeho lyoshitopolwa monima,” Irimari ta ti ngaaka. Ta kumagidha ta ti, shoka inashi shololitha oshigwana kaashi longe nokutunga oshowo okuhumitha oshitopolwa komeho.
Ngoloneya okwa li a pandula etanga lyopolisi netanga lyegameno sho ga kala taga longo nuudhiginini notaga tsikile okulonga pethimbo ndika lyomukithi gwa nika oshiponga gu li moshigwana. “Nonande omalelo goondoolopa inaga mona ompito omvula ndjika okuninga omawuliko  giipindi,  ngoka haga hili aakwiilongo oshowo yalwe yokiitopolwa ya yooloka, oku eta oshimaliwa moshitopolwa, omvula ya zi ko oya li ye shi enditha nawa,” Irimari a popi ngaaka. Irimari okwa ti, aanyasha ye li 1,803 oya li ya pewa iilonga tayi kalelele omanga ye li 829 oya li ya pewa iilonga yopokathimbo.

Muyimwe yaambyoka Uuministeli wiikwafambilika, omashingitho oshowo oongeshefa odhi li metifa okulongekidha  oompito dhiilonga kaanyasha ye li 478.
Irimari ta ti, ombelelwa yangoloneya oya longitha N$550 000  okuwathela ooporeyeka dhaanyasha ye li 11 ndhoka ngashiingeyi tadhi ya kwathele moompito odhindji.

Shoka okwa li sha kwathele okugandja iilonga kaanyasha ye li 33 moshitopolwa shaShana. Oshikandjohogololo kehe osha li sha pewa N$50 000. Omvula ndjika oosikola dhi li mbali  odhali dha tungwa moshitopolwa shaShana okupitila mUuministeli welongo oshowo inakugwanithwa oyindji ya pamba kelongo.

Ngoloneya natango okwa li a tseyitha kutya omvula ndjika epangelo olya pititha etengenekothaneko lyoomilliona N$59.5 koshitoplwa shika okulongitha nokulanda iikelelitho okukeelela omukithi gwoCovid-19.
“Uuministeli wuuhaku nonkalonawa owa pondola okumana okutunga osaala tayi ithanwa psychiatric noomilliona dha thika  N$12. Irimari okwa li a pandula oshitopolwa shaShana sho sha kala noku iyutha koompango nomilandu dha tulwa po okukeelela omukithi tagudhana onkandangala methimbo  ndika. Ta gwedha po ta ti onkalo moshitopolwa shaShana otayi tumbulwa yi li pokati, nonande oshitopolwa nasho osha taalela omawupakadhi ga yooloka.