Ngoloneya gwoshitopolwa shaShana Elia Irimari okwa pandula ookansela ayehe ya li ya mono iipundi iipe, miikandjohogololo oshowo moondoolopa, noku ya kumagidha ya longe nuudhiginini okuhumitha komeho oshitopolwa shaShana.
“Nashi kale oshinakugwanithwa shakehe gumwe kutya oshikandjohogololo noomoondoolopa adhihe mOshana odhi na aantu ye na omeya nolusheno. Onda hala mu tsikile okulonga nuudhiginini okukwathela oshigwana shi tsikile okwiigamena komikithi gwoCovid-19,” Irimari a popi ngaaka.
Ta ti, omukithi gwoCovid-19 ogwa shunitha pevi ehumokomeho momumvo 2020, ihe natango otagu tsikile okumbandapaleka nokudhigupaleka oonkalamwenyo dhaantu moshilongo.
Ngoloneya ta ti, omukithi nguka otagu ende gwa uka pombanda esiku kehe, shoka tashi tul ombwele tu kankameni.
“Endiki lyetu lyuuhaku otali longo ilonga iinene, ihe natango oya pumbwa omayambidhidho, opo ya tsikile okugandja omalongo nkene ye na okwiigamena nokushunitha pevi etaandelo lyomukithi gwoCovid-19.” Ngoloneya ta ti ngaaka.
Okwa kumagidha oshigwana shi tsikile okuyambidhidha oongeshefa pethimbo ndika, okuyanda ekanitho lyiilonga moshilongo.
Irimari a popi ta ti, aaleli naya tule oompumbwe dhoshigwana komeho nokulongelela kumwe oshowo nombili.
“Oshigwana osha tala kiipala yetu onga aaleli, ya gwanithilwe po oompumbwe nokukandulilwa po omawupyakadhi gawo ngaashi uupyakadhi wonkalo yokwaa na iilonga mokati kaanyasha oshowo ondjala moshigwana,” Irimari a gwedha po.
Ta ti, itaku tegelelwa ngula, ihe ethimbo lyokulonga opaife ngaashi iilonga ye yi inekelelwa nokutula ooproyeka miilonga.
“Oshimpwiyu shetu okukwashilipaleka nokukandula po uupyakadhi kombinga yetu yepangelo, okukandula po ehumo monima neliko lyoshilongo,” Irimari ta ti ngaaka. Ngoloneya natango okwa kumagidha ta ti, onga omuleli nomukomeho gwoshigwana, owa pumbwa okulonga neyitulamo, nuudhiginini oshowo omwiinekelwa.
Irimari ta ti, ooproyeka nadhi tulwe miilonga pethimbo opo kehe ngoka ta ka mona ompito a pewe elombwelo mbala, ye a gandje woo iilonga moshigwana, opo oshitopolwa shi hume komeho.
Ngoloneya okwa popi natango ta ti, okwa hala omumvo nguka 2021, oompumbwe dhoshigwana dhi gwanithwe po nokulonga neyitulemo komandiki guunamapya, uuhaku nelongo.