Eshi ouministeli wouhaku nonghalonawa wa tameka natango noshikonga shomoule shi li kombinga yotunhila yombuto yoCovid-19, hano ngoloneya moshitukulwa shaShana Elia Irimari ota tu omukumo oshiwana shomoshitukulwa shaShana opo shi ye momwaalu munene shi ka tunhilwe ombuto yoCovid-19. 

Meenghundafana a ninga naKundana Irimari okwa hokolola ta ti osha fimana ngeenge ovanhu aveshe ova vendwa moshitukulwa shaye shaashi omukifi ou owa
nyika oshiponga neenghono. Okwa popya ta ti efiku nefiku omafyo otaa ende a uka pombada, nomwaalu wovanhu tava kwatwa omunene nai.

Onghee hano ngoloneya okwa denga omufindo ta ti ovanhu nava ye kotunhila opo va kale ve liamena kombuto ei.

“Omwaalu womafyo ile wovanhu tava kwatwa kombuto ei otau shuna ashike pedu ngeenge twa vendweni shaashi ngeenge omunhu okwa vendwa nena oha kala e na omhito ishona yokukwatwa kombuto. Onghee hano natu kale tu na oshinakuwanifa kutya otwa tunhilwa,” Irimari ta ti. Okwa ti ovafitaongalo, nomalelo opamufyuululwakalo nava kwashipaleke kutya otava tu oshiwana omukumo opo shi ye kotunhila.

“Natu topolelafaneni ouyelele kombinga yefimano lotunhila, ovafitaongalo nava kale tava udifa momaongalo nghene sha fimana okutunhilwa. 

Omunhu keshe na kale a mona elongo ile ouyelele woshili kombinga yefimano lovenda ei. Onghee onda hala omwaalu wovanhu tava kwatwa kombuoto ei u kale wa shuna pedu meendelelo moshitukulwa shaShana,” Irimari ta ti.

Okwa hokolola ta ti eliko loshilongo ola shuna pedu paife shaashi omangeshefelo okwa kumwa konghalo yomukifi ou. 

“Koilongo imwe kaku na vali oCovid-19 shaashi ovanhu ova kala nokuliufa komilandu da tulwa po ngaashi okutunhilwa nosho tuu,” Irimari ta ti. 

Okwa weda po ta ti ovanhu nava xulife po okukala va ngudumana peenhele domalodu shaashi otapa di etandavelo loCovid-19.

“Natu fimaneke omilandu adishe
edi da  tulwa po, natu kaleni momaumbo
konima yeevili depato opo tu haninge
oihakanwa yokupewa ehandukilo kopolifi,” Irimari ta ti.