Omupopiliko gwopolisi moshitopolwa shaHangwena Inspector Kaume Itumba okwa ti oshinima shoku kuta aaniilongo mboka kaaye na oombapila otashi lunditha iimbuluma pombanda, sho ishewe otashi ndhigupaleke iilonga yopolisi.
Itumba ndhika okwe dhi popi esiku lyoshigongi shokulwitha iingangamithi shoka sha li sha unganekwa kaakwashigwana yomoshitopolwa shaNgenga.
Aanamibia oyendji unene aakalimo kiitopolwa yokonooli nonooli-uuzilo ohaya kutu aakwiilongo miilonga kokulonga momagumbo nomoofaalama mboka oyendji yomuyo haya zi koshishiindalongo Angola.
Mbaka ohaya kutwa oshoka ihaya pula oshimaliwa oshindji shokomwedhi, yo ishewe anuwa oye shi iilonga yomomagumbo, okuyelekanitha nAanamibia.
Ashike Itumba okwa kunkilile kutya, ohashi kala oshidhigu oshoka aaniilonga oyendji yAangola, kaye shiwike mpoka ya za, nomadhina gawo goshili kage shiwike, nuuna ya longo uuhwapindi ohaya tondokele koshilongo shawo, na itaya monika we.
Ta ti iipotha yomahepeko oshowo iimbuluma yi li 697 oya lopotwa moshitopolwa shaHangwena osho ashike omumvo gwa yi.
“Miipotha yiimbuluma nomahepeko yi vule 600 ya lopotwa, aantu taya fekelelwa iipotha mbyoka ye li 414 oya mangwa po kopolisi,” ta ti ngaaka.
“Otwa taalelwa kuupyakadhi womakwatonkonga, sho aakuluntu taya kwata aanona yawo yene koonkondo oshowo aanilonga yomomagumbo taya pilukile po aanona momagumbo,” ta ti ngaaka.
Ta ti aaniilonga aalumentu Aangola oyo unene ya ndhindilikwa taya kwata aanona koonkondo momagumbo, ashike iipotha yawo oyi li mwaambyoka yina aafekelwa inaaya kwatwa po, oshoka ohaya matukile koshilongo shawo.
Ashike okwa yelitha kutya omuyalu gwaafekelwa ya kwatwa po otagu ulike eitulemo lyopolisi, okulwitha iilonga mbyoka inaayi pitikwa moshilongo.