WINDHOEK – Omushiki nomunyoli weengalo Jericho Gawanab a shivika nawa onga Jericho okwa enda mefilu lomilaulu omo ovashikingalo novanyakuli vovanhu vahapu va enda. Okukala komesho yovanhu luhapu ohaku endele pamwe nondado, unene tuu ngee ino ika ko shaashi oshimaliwa, efimano noingangamwifi ohai kala ipu okunomika. 

Jericho okwa kula a tala oinima ii ihapu tai ningwa momapandaanda olukanda loDamara Location moKatutura. Omulumenhu ou okwe lihonga oinima ii kuxe, a hali nande oshihopaenenwa shiwa naJericho okwe lihanga modolongo omanga a li okaanaelela.  

Ashike okwa kayauka mo ngoo mefuta ndee ta ningi omushikingalo dingi moshilongo weengalo konima ashike eshi a dja mokalimosho. Ashike okwa wila mo natango melambo konima eshi a li a ulikwa onga omushikingalo wokomudo mo2011 koNamibian Annual Music Awards (NAMAs). 

Okwa kwatwa kostressa nokefindakano lomadilaadilo osho sha ka divilika eshi xe a xulifa lwopefimbo opo tuu opo. Monhele omo a kulila nayo inai mu kwafela shaashi oi yadi eenhele domanwino, neumbo keshe Etivali omaalaka yomapangwe noingangamifi. 

J-Twizzle, ngaashi ha ifanwa kookaume kaye okwa tameka okudenga ekende kwa fa kuhe na mongula e li nee mongudu yookaume kaye tava lumbakanifa epangwe mumwe neepela domandrax. Okwa mona yoo odegree mokufenya ocrack cocaine.

“Eshi nda mona meme ta lili efiku nefiku molwange, onda dimbulula kutya onda pumbwa okulundulula –onda pumbwa ekwafo. Onda li yoo nda utama neenghono shaashi kanda li ndi na ko nasha nonghalamwenyo. Keshe okafilinga handi mono okwa li haka i moingangamwifi nonda li yoo nda xulifa po okulihumbata ngaashi omudali kovamwange,” te lihokolola. 

Jericho okwa mona kutya okwa pumbwa okuninga po sha nokutaalela ondeemoni oyo ya li i mu na oshipala noshipala, ta pula eyambidido kofamili yaye moku shi ninga. Inawona Bience Gowanas oo e li omuyandjimayele wowina koiwana hangano oye e mu futila oule weemwedi mbali kendiki levyulonghalo. 

“Onda mona ko ovanhu ovo ve li meenghalo da naipala efimbo nda li kendiki levyulonghalo, ovanhu vamwe otava longifa oheroine ndele ova fiya po endiki inava mana ko eetundi. Evyulonghalo olo oshinima shidjuu monghalamwenyo yomupikwa shaashi nghee u li omwenyo woye owa hala ashike ngeno oto nane ko kepangwe ile to fenya okacocaine. Omaliudo efimbo u li mevyulonghalo omo otae ku lombwele kutya olutu loye ole li hala, olutu loye ola pumbwa epangwe. Ashike etokolo lokuya kendiki olo etokolo liwa nda ninga monghalmwenyo yange shaashi ngee to tale nge efimbo olo, onda li omakipa ongaho,” ta dimbulukwa onakudiwa. 

Omushikingalo oo paife a ninga Omukriste a dalululwa, okwa li a tokola okulundulula eendjila daye eshi a dja mo mendiki. Okwa dja mo monhele omo a kala ndele ta yandje onghalamwenyo yaye kuKalunga. Te lihokolola kutya omafimbo aa okwa fa a puka mo mondjila ashike okwa djala onyati opo a kale mondjila youyelele, te shi ningile ye mwene nofamili yaye. Oha i keetundi dexungomwenyo noha ilikana efimbo nefimbo, ta ti onghalamwenyo yaye oye papatwa kwaavo ve mu halela ouwa. 

“Onda tekulwa meumbo lelininipiko. Ngee owa pwilikine nawa ongalo yange oyo ta i ti ‘Heaven is missing an angel’, oto udu handi ilikana. Hano oyo oyo ondjila oyo ndi na okulandula. Onakudiwa yange, yofamili nouteku wopaKriste oo nda mona, owa kwafela nge opo ndi dimbulule kutya oyo oyo ondjila ndi na okweenda nayo. Nghi li naanaa eepelesenda 100 ashike ohandi ningi okaenda-mhadi, ondi na ashike okufika ko,” ta ti.  

Jericho ota ka pitifa oalbuma yaye muAguste, oyo ta ka yandjela Kalunga. Eshi ite ke shi ninga opo a ulikile ovanhu ashike ote ke shi ningila mouwa waye mwene. Ta ti ina pumbwa onghenda yovanhu shaashi “kutya ou longe owii ile ouwa, ovanhu onghee ngoo tava twikile noku ku popya”.

“Eshi itandi shi ningile nande omunhu umwe, ashike ohandi shi liningile amwe mwene nounona vange. Ohandi ningi paife oinima omolwa omatomhelo e li mondjila. Ondi shi shi natango ondi na ovanhu ovo ve hole eengalo dange nondi na yoo ovanhu ovo ve udite ounwa molwa oilonga yange, sho osho ashike shi na oshilonga kwaame,” Jericho ta ti.