New Era Newspaper

New Era Epaper
Icon Collap
...
Home / Kaleka omulongwa mosikola

Kaleka omulongwa mosikola

2021-10-15  Victoria Kaapanda

Kaleka omulongwa mosikola
Top of a Page

Victoria Kaapanda

Aanasikola yaakadhona yoposikola Augustineum moWindhoek, oya yambidhidhwa nuuikwathitho womathimbo komunangeshefa omushona, Naftal Nuule, mEtitatu. Nuule okwa ti, okwa yambindhindha nuututa wu li  500, ihe natango ota tsikile okugandja koosikola dhimwe.

“Onde ya po noproyeka ndjika, okukwathela aanona yaakadhona mboka ya taalela omashongo ogendji. Aanasikola oye na okuyambindhindhwa oku ya kaleka moosikola,” ta fatulula ngaaka.

Ta ti, moshiwike tashi ya ota tameke okugandja koosikola dhimwe dhokonooli, ndhoka dha tothwa mo kutya odhi na aanona mboka ye li lela mompumbwe. “Aalongwa oye na okukalekwa moosikola, uuna taya yambidhidhwa okushonopeka omaupyakadhi oshowo omashongo ya taalela. Oyendji oya thigi po oosikola omolwa omatompelo ga yolooka, nonando taga vulu okukandulwa po,” ta popi ngaaka.

Ta ti, ohashi kwathele uuna omaupyakandhi ge shiwike ta ga vulu okuholoka, taga tsakanekwa ondjla kati, opo kaaga holoka nande nande.

Nuule okwati, aalongwa oyendji oya thigipo oosikola taya yi momapandaanda oshowo okuya miihulo naasamane aanene omolwa oshimaliwa. “Aakuluntu yamwe momagumbo kayena iiyemo, onkene ohashi kala oshindhigu okulanda uuPads waanona yawo. Uuna ya adhika kuudhigu mboka koosikola, ohashi ya sholola omolwa ohoni, sigo ya thigi po oosikola,” ta popi ngaaka.

Ta ti, uututa mboka e na inawu gwana oosikola adhihe, ihe otaka kwathela ashike dhoka dhina aanona ye li lela mo mpumbwe.

“Otandi kumagidha natango aanona yaakandhona, ya kale aluhe yiilile po , uuna ya mono mukwawo e li muupyakandhi mboka, naya kale taya yambindhidhathana, okukaleka ya kwawo moosikola,” ta kumagidha ngaaka. Nuule okwali alombwele onzonkundaneki ndjika kutya, ehalo okuli na lyoku  yambindhidha oosikla andhihe, ihe onkalo yoshimaliwa itayi shi pitike.

Oshigwana osha kala noku gandja omayele komalungula kutya uuPads owa pumbwa okukala tawu hawalekwa kepangelo poosikola, unene oosikola ndhoka dhili kuushayi.

– vkaapanda@nepc.com.na


2021-10-15  Victoria Kaapanda

Share on social media
Bottom of a page