New Era Newspaper

New Era Epaper
Icon Collap
...
Home / Kambabi ta ti moipangelo yepangelo kamu na omaadi ovanhu ve na oulema

Kambabi ta ti moipangelo yepangelo kamu na omaadi ovanhu ve na oulema

2021-09-17  Festus Hamalwa

Kambabi ta ti moipangelo yepangelo kamu na omaadi ovanhu ve na oulema
Top of a Page

Omupedupresidende wehangano lovanhu vena oulema woshipa loNamibia Albino Association Trust Walde Kambabi ota hokolola ta ti moipangelo yepangelo kamu na sha omaadi ovanhu ve na oulema woshipa.

Okwa ti eshi oshi li eshongo linene la taalelwa kovanhu vena oulema woshipa shaashi kave na sha omaadi okuvava.

Pefimbo a ninga eenghundafana naKundana Etine Kambabi okwa ti ombelewa yavo ohai yakula omanyenyeto ahapu okudja moshiwana tashi kwena eshi shi li momhumbwe yomaadi okuvava.

Okwa yelifa ta ti ombelewa yavo yovanhu ve na oulema woshipa oya talela po oipangelo yepangelo, omo ya didilika kutya moipangelo yepangelo kamu na sha omaadi okuvava kovanhu ve na oulema woshipa.

“Ovanhu ve na oulema woshipa ova kala hava pewa omaadi okuvava okudilila moipangelo aishe yepangelo moshilongo, ashike paife ihava pewa vali shaashi moipangelo kamu na sha omaadi,” Kambabi ta ti.

Okwa ti unene tuu pefimbo eli lokwenye lomutenya u li metifa ovanhu ve na oulema woshipa otava mono oixuna unene komutenya shaashi paife oku na omutenya uhapu.

“Ovanhu ve na oulema woshipa ova ninga oipute paife, omanga vamwe ove na oshipa sha tenda shaashi kape na sha omaadi okuvava opo va kale ve na oshipa sha amenwa komutenya,” Kambabi ta ti.

Okwa ti unene tuu ovanhu ve li komikunda ovo vamwe tava mono oixuna shaashi kave na sha oimaliwa yokulanda omaadi okuvava.

“Ovanhu vamwe ohava ende endjiladiledile tava ka konga omaadi okuvava koipangelo yopaumwene, nokehaputeka meedoolopa shaashi koipangelo yepangelo kaku na sha vali,” Kambabi ta ti.

Okwa popya ta ti ovanhu vamwe iha va longo, vo kave na sha oyuuyema onghee eshi oshili eshongo linene kuvo.

Okwa ti ovanhu vena oulema woshipa navo ovanhu ashike ngaashi ovanhu aveshe, onghee hano epangelo ola pumbwa opo li kale la yandje omaadi okuvava ku vo.

“Nonande ombelewa yetu iha pewa omakwafo omaadi, omambale okomutwe, omakenda omutenya komahangano ya yooloka, omo hatu topolele ovanhu vena oulema woshipa moshilongo. Omaadi hatu pewa komahangano ile kovanhu ina wana okuyandja kovanhu vena oulema woshipa shaashi ovanhu ovahapu moshilongo,” Kambabi ta ti.

Kambabi okwa indila ovaleli vopapolitika, ovanangeshefa opo va yambidide ovanhu vena oulema woshipa mokuyandja omaadi okuvava, omambale omutenya nosho tuu oikwafifo ikwao,” Kambabi ta ti.

Okwa weda po ta ti eendokotola dimwe onghee tadi twikile nokukala ina di hala okuudifa eefooloma dounona vena oulema woshipa opo va dule okukala tava mono oshimaliwa shopendjela.

Kambabi okwa kunghulila ovanhu vena oulema woshipa opo va kale vena omukumo, yee ta weda po ta ti nava kale tava djala omambale nomakenda avo omutenya efimbo keshe ngeenge tava ende momutenya.

“Natu kale tu hole ovanhu vena oulema woshipa, fye natu va fimaneke. Oku kala una oulema woshipa kashishi omupya ashike omayambeko okudja kukalunga,” Kambabi ta ti.

– fhamalwa@nepc.com.na 


2021-09-17  Festus Hamalwa

Share on social media
Bottom of a page