RUNDU-kansela gwanare gwaNkurenkuru Damian Nakambare kavamusilikire kulifutiramo komupanguli morwa nositambo asi age nare gakara hena noumbondo wangoso, omu ana kara asi age ngesi ponze morwa kwalifutira mon are, morwa umbondo ou karugene unene ntani kuna kara matjiliso kovantu, makona kono ntani tupu gana kutameka. 

Mupanguli katente asi Nakambare gakara nare nosirapotwa sokumugazarera kudipaga omu vamupere nye alifutire, ntani kuna kara hena nosirapotwa sowidi  komberewa zetu zokupangwira koRundu. ‘’ Ose kapi tuna kupulisira efutiro nkenye, morwa umbondo ou unene unene, ou una tamba mugazarerwa ogu, morwa makona kono simpe ntani gana kutameka, age gumwe gakara asi kuzona nkenye siruwo yokulifana eyi yina kara asi nare garugana yangesi yahorokere komukunda gwaNcaute –ntani ame kuna yidiva asi gakara hena neropotoi lyowidi lina kara koRundu,’’ yimo ana kutanta mupanguli Godfry Shivolo, ogu kakarerepo epangero mosipangura sangesi. Mugazarerwa kamonekere mosipangwira saKahenge mmoKavango zoutokero komeho zomupanguli Barry Mufana. Vaporosi womoKavango zoutokero kavakwete Nakambare mosondaha kositenguko pomukunda Mayaraomu karoyere nokumuremeka gono mvhura 42 ekoro lyendi morwa mutangu kavakere nago. Age karoyere muntu ogu awo vaporosi nawo kuna sikama, ava kavakere asi ngano kuna kupurakena udigu wendi, ou karetere kovaporosi nokutanta asi simpumba sendi kapi ana hara kugava nonsapoi dehauto lyendi. Siruwo nye oso vaporosi kavahere asi vavagaunune, age kagusiremo nye uta wendi kumwe nokuroya munyandi, ogu ana kara ngesi asi kuna kumuhakura mosipangero sepangero saNankudu konyima apa karemanene unene. Mokukwama vaporosi, kuna kuyimona asi mugazarerwa karoyere munyandi ogu nopisitoli zo 9 milimeter posinene. Nakambare kuna mutamba edipago, ntani kuruganesa uta mepuko kulirwanesa noveta zoma uta zo 38 ACT, act 7 zomo 1996, omu kakere asi kagendere nouta monkarapamwe. Nakambare sirapotwa esi kuna sirundurura dogoro mo 8 Mangundu omu ekona kono lyovaporosi nalitwikira ntani mugazarerwa ogu apa pare mukarelipo gwendi ogu ana hara mqwene. Ntani age kavamufatwilire nawa nawa nonkondo dedi dokugwana ehundiro lyokulifutira akare ponze nsene asi yimo ana hara nage mwene.  –jmuyamba@nepc.com.na