Kansela gwoshikandjohololo shaTobias Hainyeko Christoph Likuwa mEtiyali okwa li a ekelehi olopota yangoloneya gwaKhomas, Laura McLeod-Katjirua kutya ope na uundjugo 65 wa tungwa moshikandjohogololo moshikakomumvo shoshimaliwa moka tu li ngashiingeyi.
McLeod Katjirua ndhika okwa li e dhi popi pethimbo a li ta popitha nokugandja uuyelele kaakalimo yomoshitopolwa she mEtiyali, sho a ti kutya oshitopolwa shaKhomas osha katuka oonkatu dhi iwetikile sho sha gandja omayakulo omapumbiwa kaakalimo yokomalukanda.
Okwa ti kutya elelondoolopa olya li lya ikalekele oshimaliwa shomiliona N$1,9 yokutunga uundjugo moshikandjohogololo shaTobias Hainyeko moshikakomumvo shoshimaliwa sho 2019/2020, nokutya uundjugo mbuka owu na okukala wa pwa ngashiingeyi.
Ashike Likuwa okwa ekelahi olopota ndjika, ta ti ngoloneya ina pumbwa lopota koopolojeka ndhoka inaadhi pwa. Ta ti okwa mona edhilaadhilothaneko ashike kape na uundjugo wa tungwa ngaashi ngoloneya a tseyitha.
“Otandi dhimbulukwa sho omukithi gwoCovid-19 gwa tukuka, elelo lyoshilando olya li lya pewa oshimaliwa komahangano goNampower, Social Security Commission noNamWater ya tunge uundjugo moshikandjohogololo shandje, ashike uundjugo ashike uyali wa tungwa onga oshuulikitho,” Likuwa ta ti ngaaka.
Ta ti kutya okwa thikama a yamukule oshipiwa shangoloneya oshoka aantu oya pulakena, notaye ke mu pula kutya uundjugo mboka ou li peni. 
McLeod-Katjirua ta ti kutya oha pula aantu mboka haya gongele uuyelele woolopota noku wu fala kombelewa ye. Onkene, ye oha lopota ashike kwaashoka she ya kombelewa ye na ita vulu okuthina aantu uuyelele. “Otatu shi landula tu mone kutya ngoka ta popi oshili ole.
-Nampa