Victoria Kapanda

OSHAKATI - Kansela omupeepeka gwoshikandjohogololo shOndangwa yOmondoolopa ngoka opo a hogololwa, Leonard Negonga, okwa li a ganithilwa miilonga ye kumangestrata Helen Ekandjo mOshakati mEtiyali. Omunamimvo 60 nguka okwa li a ganithilwa oshinakugwanithwa she moombelewa dhelelo lyoshitopolwa shaShana, sha ningwa montaneho yaakwashigwana, moka mwa kwatelwa wo iilyo yimwe yoSwapo mbyoka ye mu thindikila okuza kOndangwa. Negonga okwa li a hogololwa onga kansela omwedhi gwa zi ko sho a pingene po Elia Irimari ngoka a li a yelwayelwa komupresidente Geingob onga ngoloneya gwaShana muMaalitsa. 

“Onga kansela, omweelo gwombelewa yandje  otagu kala gwa egulukila aantu ayehe, mwa kwatelwa aagundjuka, aakuluntu, aanuulema, oothigwa naamboka ye li monkalo ondhigu, otandi kala ewi lyaakalimo yomoshikandjohogololo shetu,” Negonga ta ti ngaaka.

Ta ti sho e na ontseyoo yiinakugwanithwa ya yooloka yookansela, ota ka pulakena koompumbwe nuudhigu waantu ayehe.

Ta gwedha po kutya ota ka tsikila natango nokulonga  nokutula miilonga omathaneko gepangelo lyoSwapo, ngaashi kombinga yeputuko, omagumbo, iikulya nuundjolowele.

“OSwapo natango oyi li onga omuhwahwameki gwehumokomeho, oshikandjohogololo shOndangwa Urban otashi ka kala shin a onakuyiwa yi li hwepo,” Negonga ta ti ngaaka.

Negonga okwa li a sindana po omahogololo guukansela nomawi 1936, nokwa li a landulwa komukuthimbinga i ithikamena Angelina Immanuel ngoka zile mo nomawi 1 402. Oongundu oonkwawo ndhoka dha li dha kutha ombinga odho, Popular Democratic Movement (PDM) ndjoka Johannes Martin a li a zi mo nomawi 326, All People’s Party (APP) ndjoka ya li ya kalelwa po kuAsser Vincent nomawi 97 noCongress of Democrats (COD) ndjoka Mandume Andreas a li a zi mo nomawi 31. Maayishangithi 16 000, aantu ashike ye li 3792 ya li ya kutha ombinga momahohololo.