New Era Newspaper

New Era Epaper
Icon Collap
...
Home / Kapofi ta ti ovakwaita nava fimaneke oufemba womunhu pefimbo lepato

Kapofi ta ti ovakwaita nava fimaneke oufemba womunhu pefimbo lepato

2021-07-08  Festus Hamalwa

Kapofi ta ti ovakwaita nava fimaneke oufemba womunhu pefimbo lepato
Top of a Page

Minista wetanga leameno noonakulwa vakulu Frans Kapofi ota ti ovakwaita nave lihumbate nawa unene tuu ngeenge tava longo novanhu pefimbo loshikonga shoku tula po elandulafano oufiku.

Meenghundafana a ninga naKundana Kapofi okwa hokolola ta ti okwa didilikwa ovakwaita itave lihumbata nawa ngeenge ve li moshikonga shoufiku. Ta ti ovakwaita inava pumbwa okukala tava denge ovanhu ile tava tile ovanhu omalodu, ndele nava kale tava popi novanhu nawa nokufimaneka ovanhu ngaashi navo va fimanekwa.

“Oshiwana nasho nashi longele kumwe novakwaita, oshiwana osha pumbwa okukala tashi fimaneke ovakwaita ngeenge ve li moilonga yavo. Onghee inandi hala okulopotelwa omukwaita a tila omunhu omalodu ile omukwashiwana ta lwifa omunambelewa wetanga leameno,” Kapofi ta ti.

Kapofi okwa popya ta ti elalakano lovakwaita okuamena oshiwana, nokutula po elandufano unene tuu pefimbo e li moshilongo mu na omukifi woCovid-19 tau dana onghandangala, onghee hano oshiwana osha pumbwa okukala tashi liufa komalombwelo aa a tulwa po. 

“Ngeenge omunhu ite lihumbata nawa nena omunambelewa wetanga leameno oku na oufemba wokutwala omukwashiwana oo kodolongo opo a ka patelwe mo ile a pewa ehandukilo a fute oshimaliwa shonhumba. Hano oshiwana otwa pumbwa okukala tu li momaumbo pefimbo e li omalinyengo ovanhu a ngambekwa okuenda oufiku,” Kapofi ta ti.

Kapofi okwa ti ovakwaita vetanga leameno nava twikile okukala tava ka vendwa shaashi omukifi ou owa nyika oshiponga neenghono. 

Okwa weda po yoo vali ta ti oshikondo shaye nasho osha dengwa pomutima kombuto ei eshi sha kanifa oilyo yasho imwepo ya fya kombuto yoCovid-19. Onghee okwa ti ombuto ei oi li nayo ya kuma oshikondo shetanga leameno unene.

“Out na omashongo oikwafifo inai wana ngaashi omanyala, oulapi vokomilungu nosho tuu oinima ikwao ihapu ei ya pumbiwa okulongifwa kovakwaita pefimbo eli loCovid-19 i li moshilongo,” Kapofi ta ti.

Kapofi okwa ti ngeenge ovanhu otave lihumbata nawa nena nomwaalu wovanhu tava kwatwa kombuto otau shuna pedu, yee ta ti oshiwana nashi kwashipaleke kutya otashi liufa komilandu doCovid-19 efimbo keshe.


2021-07-08  Festus Hamalwa

Share on social media
Bottom of a page