New Era Newspaper

New Era Epaper
Icon Collap
...
Home / Kashi shi shoshili – Shangula

Kashi shi shoshili – Shangula

2021-12-07  Festus Hamalwa

Kashi shi shoshili – Shangula

Omunista youhaku nonghalonawa Dr Kalumbi Shangula  okwa ti kasha shi shoshili kutya ovanhu ava va mana ko eevenda davo doCovid-19 ove na omhito ya kula yokukwatwa kombuto yoCovid-19.

Shangula okwa yelifa ta ti onghundana tai dana onghandangala komalungula oyo ipupulu kutya omunhu ngeenge  a tunhilwa oha kala e na omhito ya kula yokukala a kwatwa kombuto mokufafanifa nomunhu ou ina tunhilwa.

Okwa ti oshiwana ina shi landula ouyelele woipupulu kombinga yoCovid-19 tau tandevelekwa komalungula shaashi eshi otashi kufa ovanhu ohokwe yokukala va katunhilwa. 

Minista okwa kunghulila oshiwana opo shixulife po okutandaveleka ouyelele woipupulu uli kombinga yovenda yomukifi woCovid-19.

Shangula okwa ti ovanhu aveshe ova pumbwa okukala va tunhilwa diva manga ekufikufi etine ina li fika moNamibia opo va kale veli amena.

Edi Shangula okwe dipopya Omaandaxa eshi a ninga eenghundafana naKundana ta hokolola ta ti ovanhu nave lilongekidile ekufikufi etine okukala va mona omhito yokukatunhilwa shaashi ekufikufi eli tali ya ola nyika oshiponga neenghono.

Minista okwa ti osha fimana ngeenge ovanhu aveshe va tunhilwa shaashi eshi otashi shunifa pedu etandavelo lombuto moshilongo.

Okwa ti ovanhu nava topolelafane ouyelele kombinga yefimano lovenda yoCovid-19 opo ovanhu va kale vena eudeko la wana lokukala va ka tunhilwa.

“Ookansela, oveene vomikunda va twikile okuninga oikonga kombinga yetunhilo yombuto ei opo oshiwana shi kale sha xwaxwamekwa okukala shina ohokwe yokutunhilwa,” Shangula ta ti.

Shangula okwa ti moshilongo omuna omiti dawana okutunhila ovanhu, onghee ovanhu ina va kala vena oumbada kombinga yomiti detunhilo.     

Okwa  weda po ta ti omwaalu wovanhu tava kwatwa kombuto otau londo wau ka pombada efiku keshe unene tuu moshitukulwa shaKhomas.

 

“Natu twikile okulifa komilandu doCovid-19 efimbo keshe pefimbo eli lomatango manene shaashi omukifi ou owa nyika oshiponga neenghono,” Shangula ta ti.

fhamalwa@nepc.com.na


2021-12-07  Festus Hamalwa

Share on social media