Katengo kakhuta yalifasi (ICC), kahanile kupo yakatengo kaCaprivi Concerned Group (CCG), yakuli kabatisise mafu amandui babane, ane apetilwe kimasole banaha Botswana kamaikuto akuli neli mafu asituhu. Khuta neize haina maata akubatisisa taba. Mizwale babalalu, Tommy (48), Martin (40) ni Wamunyima Nhcindo (36) ni muhabo Sinvula Munyeme (44), nebakunupilwe kimasole banaha Botswana la 5 Njimwana 2020, kwamukulela wanuka ya Chobe. Kezahalo yeo netisize lipilaelo ni pizo yakuli naha Botswana iambuke mulao wateni osika ñolwa wakubulaya kwamukulela wamuseto ni naha Namibia.
Katengo kaCCG mwakweli ya Muyana 2022, nekakupile katengo kaICC kubatisisa mubusi wanaha Botswana Mokgweetsi Masisi, niyomuhulu wasisole sahae Placid Segokgo, kapulao yesituhu yabaana babane. Kono mwaliñolo laku alabela kwakatengo kaCCG, katengo kaICC nekaize hakakoni kubatisisa. Katengo kaICC kayemela kuatula litaba zalifasi mi khuta yateñi ifumaneha mwamuleneñi Hague, mwanaha Netherlands. “Hala litaba zene luamuhezi, kezahalo yebihilwe ibonahala kuasawela mwakalulo yaluna. Kalibaka leo, muzekisi unyatezi kuli hakuna mutomo wakuzwelapata,” sibuabui ni muzekisi kwakatengo kaICC Mark Dillon nabulezi mwaliñolo la 20 Muimunene 2022.
Muñoli wakatengo kaCCG Edwin Samati naize sikwata sisa ambolisana ni bayemeli basona, nihakulicwalo neba bihile taba viki yefelile kwakatengo kakabona zaliswanelo zabatu kaUNHCHR, kasepo yakuli kakatalima taba. “Nihaike kalabo haitabisi mi halulumelelani niyona, lwaitumela kuli khuta neize kwapili ika talima taba haiba inge lufa bupaki bobunca,” nekubulezi Samati. Zeo litaha mazazinyana kasamulaho Mubusi Hage Geingob, nahupulisize ndumeleti yasafunduka wanaha Botswana mwanaha Namibia, kuli silikani mwahala linaha zepeli sika fofala haiba inge kuba nikubulaya bayahi balinaha zepeli.
Nakile abulela hape kwamulaho kuli taba iswelwi kutalimiwa famayemo apahami kilinaha zepeli. Labulalu nabulelezi ndumeleti Batlang Serema kuli “halukoni kuipiza balikani babande lika zeswana sina kukunupa kwale inge liezahala.” Mwakatulo unumwaha, muatuli wasikiliti Taboka Mopipi nafumani kuli masole banaha Botswana nebasina mulelo wakubulaya mandui, kono neba itwanezi kasamulaho mandui bakunupa pili. Katengo kaICC kakona kubatisisa litaba zalipulao, kuomba moyo ni bubangoki mwalindwa. Kamita kanyaziwa kuli kana ni ketululo.