Lüderitz – Meekulu Alina  natatekulu Simon Shipanga ove li oshihopaenenwa shiwa kepupi lanakanena eshi va wanifa eedula di li 55 mohombo yavo, otava tumbula kutya  okefilonghenda laTate Kalunga va dula okukala pamwe oule weedula adishe odo di li 55 ve li mohombo yavo.

Meekulu Alina okwa  kufilako Kundana ta ti yee nomuholike waye Simon ovahombolele momafiku 10 November 1963 meongalo  laExodus moLüderitz ,va hombolifwa komutumwa Omugerman omufita Rotzcotin, nodula yoneudo momafiku eshi a li 10 a Novemba ova wanifa eedula di li 55 mohombo, osho meekulu Alina a tumbula kutya, yee nomuholike waye, otave shi pandulile Omushiti.

“Eshi inashi dula nande okuningwa keenghono detu vene, ndele osha ningwa keenghono daKalunga mwene, opo tu dule okukala mohombo yetu oule weedula di fike opo. Ohatu pandula Kulunga eshi e tu humbata, okwe tu pa eumbo okwe tu pa yoo nomaano oludalo, Tate Kalunga ohatu mu pandula unene eshi e tu pa eemwenyo di shii okulididimikilafana.

Oshinenenima mohombo oku lididimikilafana, okukala noku indila Kalunga, okukala mu na ohole ihe na oikonene nelididimiko, nediminafanepo, oyo oinenenima yomohombo, nashikwao inamu efa nande etango liningine inamu paafana ombili, ngeenge mwa ningafana nai.

Etumwalaka kwaavo ve li meehombo, meekulu Shipanga ota ti: “ Kaleni noku indila Kalunga, kaleni muholafane inamu kala mu na oikonene, inamu efa etango liningine inamu paafana ombili, kaleni noku lididimikilafana nava kale nokuyakulafana omitengi, opo va dule okuwanifa ehalo laKristus, Mwaashishe osho tamu shi ningi kaleni alushe noku dimbuluka omaudaneko aeshe mwe a lombwelwa mefiku lehombolo leni opo ashike tamu dulu okuya komesho nohombo yeni kaleni alushe noku indila Kalunga.”

Meekulu Alina okwa yandja omayele, anghene ovanahombo ve na okukandula po omaudjuu oo tae va shakeneke mohombo, ota ti omukundu keshe tau holoka mohombo, kendabaleni amushe mu gu kandulepo, ndele ku hatalike kutya umwepo oye aeta omukundu oo waholokapo.