Minista woukashikekookanhu nonghalonawa yokaana okwa holola eudonai laye omolwolopotwa yovanhu tava ningile ominyonena ovanhu ve na oulema woshipa.
Doreen Sioka, okwa ti omunhu keshe ta ka ningila ovanhu voshipa shitoka ominyonena na kwatwe po meendelelo.
Minista okwa ti okwa haluka eshi a uda onghundana yolopota yovanhu ve na oshipa shitoka tava tetwa eexwiki noipanyala yavo opo i landifwe.
Sioka okwa ti ovafekelwa ava va kwatwa po eshi kwa li tava kendabala okufuta omulumenhu e na oulema woshipa opo a kale ta dipaa ovanhu ve na oulema woshipa inava pitikwa okudja mo modolongo.
Okwa ti ovafekelwa ova pumbwa okuningilwa omakonakono omoule opo va yandje ouyelele ngeenge ope na natango ovanhu vakwao kwa li ve liunganeka navo ve na omadiladilo okudipaa.
Edi Sioka okwe di popya Etivali eshi a ninga eenghundafana naKundana, a ti oshiwana nashi kale tashi lopotele opolifi efimbo keshe kombinga yovanhu tava ningile ovanhu woshipa shitoka ominyonena.
“Onda tilifwa eshi nda uda onghundana ei kutya ovanhu ve na oulema woshipa otava ka ningilwa oilonga yominyonena eshi tava kala tava tetwa eexwiki noipanyala yavo,” Sioka ta ti.
Okwa ti ombelewa yaye otai i mo eenyala moshibofa shovafekekelwa vavali ve li medolongo opo vaha ndje mo shaashi ngeenge ova pewa oboolofa natango otava kala va longe oilonga yominyonena.
“Ovanhu ve na oulema woshipa navo ovanhu ashike ngaashi ovanhu aveshe, kashi li mondjila okuningila ovanhu voshipa shitoka ominyonena,” Sioka ta ti.
Ovafekelwa va dile koshitukulwa shaZambezi ova anyenwa obolooha yokulifutila mo modolongo oshiveke sha dja ko momhangu yaKatutura moWindhoek konima eshi va holoka momhangu loshikando shotete.
Ovafekelwa ovo Fred Simasiku weedula 50 naObrine Liwelu weedula 45, noshibofa shavo osha undulilwa komafiku 29 June 2022.