New Era Newspaper

Icon Collap
...
Home / Ketruva Investment CC ya yandja oikulya kovanhu ve li momhumbwe

Ketruva Investment CC ya yandja oikulya kovanhu ve li momhumbwe

2021-05-03  Festus Hamalwa

Ketruva Investment CC ya yandja oikulya kovanhu ve li momhumbwe
Top of a Page

Festus Hamalwa

Ovakalimo vomOngwediva ava ve li momhumbwe yoikulya ova pewa oikulya kongeshefa yedina Kretuva Ivestment CC. Oikulya ei oya yandjwa koSam Nujoma Multi-Purpose Centre mEtitano keembelewa delelo laNgwediva.

Elizabeth Ileka naKretus Ileka, ve li ovo ovakulunhu vongeshefa ei ya yandja oikulya kovanhu mOngwediva ova hokolola nehafo kutya elalakano okukwafela oshiwana eshi shi li momhumbwe yoikulya.

Ileka okwa ti oku na oshiwana komutima, onghee eshi oshe va pa omanenedilaadilo opo va ka lande oikulya i pewe ovanhu ve li momhumbwe.

Oikulya oyo oukutu voufila, eeshi deendooxa, omacoroni, omaadi okutula moshivelelwa, oinima ei oi li pongushu N$12 000.00.

“Otwa hala ovanhu aveshe va kale ve na oikulya yokulya momaumbo avo, inatu hala nande oshiwana tashi mono oixuna shihe na eshi tashi li, onghee oikulya ei oya nhuninwa ovanhu aveshe ava ve li momhumbwe yoikulya,” Ileka ta ti.

Ileka okwa ti ongeshefa yavo otai twikile nokukwafa ounona, novakulunhu ava ve li momhumbwe yoikulya.

Okwa yelifa ta ti okuyandja okutulika onghee oku udite etumba eshi ongeshefa yaye tai yambidida okuyandja oikulya koshiwana eshi sha pumbwa oikulya moshili.

“Ohatu twikile okupa ovanhu oikulya unene tuu eefiye novanhu ava ve na oulema naaveshe ava va pumbwa ekwafo loikulya. Ongeshefa otai lalakanene okulwifa ondjala moshilongo, nokukwashipaleka kutya oshiwana osha lya sha ngeenge tashi ka nangala,” Ileka ta ti.

Koshiindingili eshi okwa li yoo ku na mayola wodolopa yaNgwediva Tarah Shalyaefu.

“Onda pandula unene eshi mwa kufa etokolo lomondjila opo mu yambidide  oshiwana noku shi pa oikulya eshi tashi mono oixuna shihe na eshi tashi li. Oikulya ei oi na okupewa ava ve i nhuninwa,” Shalyaefu ta ti.

Mayola okwa ti ovanangeshefa aveshe nava kufe oshihopaenenwa eshi sha ningwa kongeshefa yoKretuva Investment CC eshi ya longa oshilonga shi pandulwa.


2021-05-03  Festus Hamalwa

Share on social media
Bottom of a page