New Era Newspaper

New Era Epaper
Icon Collap
...
Home / Kwafela Oshiwana Foundation a yambidida eenhauki

Kwafela Oshiwana Foundation a yambidida eenhauki

2021-07-27  Festus Hamalwa

Kwafela Oshiwana Foundation a yambidida eenhauki

Ehangano Kwafela oshiwana ola yandja omakwafo keenhauki dovaAngola edi da ninga eemwedi dangudumana pEtunda moshitukulwa shaMusati. Eenhauki edi oda pewa oikulya, oikutu, oikumbafa, eenghaku nosho tuu oikwafifo ikwao.

Moshipopiwa shaye ngoloneya woshitukulwa shaMusati Erginus Endjala okwa tambula ko oinima ei nolupandu linene. Endjala okwa ti okwa pandula ehangano eli eshi lina olukeno noshiwana eshi shili momhumbwe.

“Ngaashi naana tu shishi kutya eenhauki edi odili momhumbwe yoikulya noikwafifo ikwao, omo mwa didilikwa oikulya oyo unene i li eshongo linene eenhauki da taalela,” Endjala ta ti.

Ngoloneya okwa ti otai indile ovanangeshefa ile omahangano akwao opo va yambidide eenhauki edi shaashi natango oda pumbwa omakwafo ahapu. Onghee okwa ti oshiwana nashi kwatafane nombelewa yaye ngeenge shina omakwafo oku pa eenhauki.

Okwa didilikwa enhauki edi da taukila moNamibia ketameko lomudo ou, odo kwa li deliyanena moshitukulwa shaHangwena noshitukulwa shaMusati. Mopaife ngaha ovaAngola ava ovangundumana ponhele imwe i li pEtunda, opo hadidi nodili metonatelo la wana.

Omukulunhu wehangano loKwafela Oshiwana Foundation Paulus Kronelius okwa ti ehangano lavo otali lalakanene oku kwafa oshiwana ashishe eshi shi li momhumbwe. 

Kronelius okwa ti okwa li va mona omukunda wa dja kungoloneya woshitukulwa shaMusati ta kongo omakwafo moshiwana shi yambidide eenhauki dili moshitukulwa shaye. Onghee ehangano eli ola kala noku hongela oshimaliwa opo li ka landele eenhauki omakwafo.

“Natango ohatu shuna ko keenhauki edi opo tu di twalele eetenda dokunangala shaashi okuna outalala neenghono. Onghee ovanhu ava vena ounona va shona ovo tava ka pewa tete eetenda opo ounona va kale veli monghalo iwa,” Kronelius ta ti.

Okwa weda po tati keshe omunhu okwa manguluka opo a kale evawaimina, vo vashiive va longele kumwe nokuyambidida eenhauki edi, onghee ovanhu nava kwatafane nombelewa yavo i li mOndangwa.


2021-07-27  Festus Hamalwa

Share on social media