Victoria Kaapanda

Ehangano lyokuyambidhidha aantu ye li moluhepo oshowo taya si ondjala “Kwafela Oshiwana” ota li tsikile oku gandja omakwatho ga wo miitopolwa yilwe yoshilongo.

Etitatu lyoshiwike shika oya kwathele aakalimo yomoshitopolwa shaKunene koKhorixas nooshako dhuusila dhi li 400.
Omukwatelikomeho gwehangano ndyoka Paulus Cornelius okwa ti, uusila mboka otawu ka gandjwa kombelelwa yaKansela, etawu ka topolelwa mboka ye li lela mompumbwe.

“Atu tsikile okukwathela oshigwana naashihe tatu vulu okuyambidhidha nasho, oku za koombinga adhihe dho shilongo, oshoka ehangano ndika olya totwapo okukwathelathana,” Cornelius ta ti ngaaka.

Ta ti, natango oyagandja omakwatho kaanona yomomapandaanda , mboka ngaashi ngeyi ya ningilwa osenda mpoka taya kala taya zi moshitopolwa shErongo, molukanda ta li ithanwa DRC.

“Konima kwa li twa mono omayindilo oku za komukulukadhi ta sileshimpwiyu aanona mboka oshowo aakuluntu mboka kayena omalukalo, okwa li twa dhidhilike muupyakadhi yeli, no kuya pa omakwatho,”Cornelius a popi ngaaka.
Ta ti, oya yambidhidha noohako dhuusila 100. Paulus a popi ta ti, oshiwike tashiya otaya kagandja natango omakwatho koshitopolwa shaShikoto , koKing Kauluma. “Otatu kayambidhidha ayelele nomalwishi, omagadhi gokulya , oosuka, omakoloni niikwawo oyindji. Aantu mboka hatu yambidhidha ohaye tupe omukumo gwokakwathela natango mboka taya ningi omayindilo,” Cornelius popi ngaaka.
A fatulula ta ti, ehangano ndika okwe li to topo wo natango nomatompelo ogendji ga yooloka.
Ta ti, nonando ota kwathele mboka ye li muunyengwi nenge taya si ondjala, natango otaya yambidhidha wo epangelo poompito dhimwe, oshoka ha kehe gumwe eli moluhepo ha mono ompito yoshikwila shepangelo.

Cornelius ta ti, ehangano ndika olya totwapo muJuli nuumvo, pethimbo aakalimo yomoshitopolwa shErongo ya li ya patelwako uule weemwedhi ndatu, omolwa omukithi gwoCovid 19.
“Ehangano ndika olya kwathela aantu oyendji lela, no ta li tsikile okukwathela, oshoka  nalyo otali yambidhidhwa koshigwana, “ Cornelius  ta ti ngaaka.
Ayihe mbyoka ya yambidhidhwa nayo, oye yi gandja komeho gwomalelo gwopamuthigulwakalo gaali, elelo lyaNdonga oshowo oshowo elelo lyUukwanyama.