Sho ta ka umba dhokuusita oshikando shotango mevi lyaAmerica, omubokisi gwaNamibia Sakaria ‘Desert Storm’ Lukas oku na oku ka tula ombunda moshihwa moshiviha shoSuper Featherweight, shomadhingoloko 10 sho ta ka kuthathana po nomubokisi Isaac Avelar ngele okwa hala oku ka kondjela epapa lyuuyuni. Uudhano mbuka otawu ka dhanwa mOlyomakaya pokapale ko-AT&T Cowboy Stadium moArlington, Texas, USA, notawu ka kala uudhano wumwe mboka tawu ka patulula uudhano uunene pokati kaErrol Spence Jnr naDanny Garcia mboka taya ka kondjela epaya lyoInternational Boxing Federation (IBF) noWorld Boxing Organisation (WBC) goshiviha showelterweight.

Lukas, ngoka a li a lu lwahugunina muDesemba omumvo gwa yi sho a li a dhenge Raston KayiragwaMalawi medhingoloko etitatu muudhano wawo womadhingoloko gahamano moWindhoek, okwa tegelelwa a ka ete uudhano we wongushu ngele okwa hala okusindana.

Muudhano 28, Lukas nkene a valwa a dhengwe, omanga naku mu taalela, omunamimvo 23 okwa sindana iikando 16, omulongo gomomasindano ngoka okwa dhenge noku tula yakwawo pevi, ye okwa dhengwa uudhano uwali ashike.
Omunamimvo 35 nguka Omunamibia ota ka ya koshiyelekanitho oshinene muudhano we sho ta ka taalela omunamivo 28 ngoka a li nale enyakwa lyuuyuni moshiviha shoFeatherweight. Oyendji oya tegelela Lukas a ka wayuke mo muudhano muka nesindano. Ta popi noshikundaneki oshimwayina naashika shoNew Era, omudheuli gwaLukas ngoka wo e li a tota AC Boxing Academy Imms Moses okwa ti otaya nyuwa moompadhi okutaalela Avelar noya tegelela omudhani gwawo a ka sindane pawufuuli.

“Opo ashike twa thiki mEtiyali komatango moDallas, Texas, ngaashi mu shi kutya iinima oya lunduluka, katu na mpoka tatu vulu okuya sigo tatu mono iizemo yetu yoCovid-19, notwa tegelela mOlyomakaya uudhano mbuka pokati kaLukas naAlaver koPremier Boxing Champions (PBC) koFox PPV,” ta ti ngaaka..
Ta gwedha po ta ti, “Uudhano mbuka otawu ka tula Lukas ponomola ontiyali momusholondondo gwo-IBF osho wo WBO, notwa tegelela Lukas a sindane opo a mone epaya lyuuyuni omumvo tagu ya.”