Oshipangelo shopawumwene, Ongwediva shoMedipark osha yambidhidha Selma Tobias ngoka a li a pula omakwatho moshigwana omwedhi gwa ziko, sho ali a mono uunano utatu (elongo) momasiku 31 lyaMei nuumvo.
Thobias okwali a pula omakwatho ta ti, kena sha iiyemo yasha opo a vule okuyambidhidha uunona we mboka, ishewe, he yuunona iha longo.
Oshipangelo shika osha yambidhidha nomahini, uusila, ominambo, iikutu oshowo iinima oyindji yuunona.

Kansela gwoshikandjohogololo Onyaanya Petrus Kambala okwa ti, oshipangelo shoka shopawumwene osha yambidhidha nosha kwathele epangelo mokukwathela aakwashigwana taya mono ihuna nenge taya si ondjala moshilongo.
“Konima onkundana ndyoka yali ya pitithwa kiifokundaneki kutya Tobias okwa pumbwa omakwatho, mekwatelo komeho lyomukwakanithi nomugandji gwomawuyelele moshipangelo moka, Katarina Elago opamwe naanilonga pamwe naye, okwali ya tokola opo ya yambidhidhe nashoka ya gandja,” Kambala  a popi ngaaka.

Ayihe yali ya yambidhidhwa nayo, oyina ongushu N$ 5 000
Tobias okwayambukile momukunda Omafufu moshitopolwa shaShikoto. Okuna nale uunona wuli utatu, mboka wuna oomvula omugoyi, ntano nandatu.
“Ondali nda pula omakwatho ngoka oshoka ka kwali ndina sho tandi yambidhidha nasho uunona wandje  mbuka nda pewa omagano kuKalanga omanga ndanyengwa nale kwaamboka ndakala nawo,” Tobias a popi ngaaka. 
Ta ti, inakala eshiwo ngele okwahumbata omalongo, nashoka okwekeshi shiwa esiku a mono uunona we mboka.
Tobias okwati, okwapandula kwaayihe a yambidhidhwa nayo, na paife ota vulu okupalutha uunona we, nonando otaka pumbwa omakwatho ga gwedhwapo komasiku tage keya.