Micheal Shekutamba weedula 10 okwa pewa okatemba kehangano loStanlib konima eshi a kala a twalwa kofikola kuxee tave ende oshinano shekilomita 10 okuya kofikola nokushuna keumbo
Micheal iha dulu oku enda shaashi okwa dalwa e na oulema komaulu ashike oha kala telikoko medu ngeenge eli kofikola ile ngeenge eli keumbo.
Pefimbo lodula Micheal ohava kala tava ende meeshana domeva naxee ngeenge ta twalwa kofikola kuxee, omanga omafimbo amwe oha faula keetundi shaashi omeva ohaa kala male unene.
Omunafikola ou okuli mondodo onhi-4 kofikola Dr Albert Kawana momukunda Eenawa moshitukulwa shaMusati.
Omunambelewawiliki konooli wehangano Stanlib Philip Ashimbanga okwa ti okwa kala a mono Micheal a lushe ngeenge ta twalwa nokukatalika kofikola kuxee, omanga omafimbo amwe oha hange Micheal teli koko medu ngeenge tadi kofikola.
Ashimbanga okwa ti naashi osha eta opo a kale a shiivifila ombelewa yavo yokoWindheok kombinga yonghalo yaMicheal opo a kale a pewa ekwafo lokatemba.
Okatemba oka landwa kongushu yoshimaliwa N$8000 opo a kale ta longifa ngeenge tai kofikola efimbo keshe nokukala yo vali ta longifa okatemba meumbo. Ashimbanga okwa ti ehangano olina ondjodi yokukala la yambidida ounona aveshe vokonooli veli momhumbwe youtemba.
Moshipopiwa Micheal okwa ti okwa pandula unene ehangano loStanlib eshi lemuyambidida lokatemba shaashi paife ita ka kala vali telikoko medu.
“Onda pandula unene shaashi onda kala hadi mono oixuna eshi hadi kala ashike a ndilikoko medu ngeenge dili kofikola navakwetu,”Micheal ta ti.
Johannes Micheal xee yomunafikola a pewa okatemba okwa hokolola ta ti kashipu okukala ta twala okaana kaye kofikola okudja Omaandaxa fiyo Etitano eshi hava kala tava ende eendjiladiledile okuya kofikola.
Okwa ti omafimbo amwe ngeenge a kalako keumbo okukatala Micheal kofikola oha hange nale teli koko auka keumbo eli mondjila.
Okwa ti omafimbo amwe oha kala kofikola a telela opo okaana kaye ka dimbuke shaashi shinano oha shi kala shile okushuna keumbo nokwaalukila kofikola.
“Ohandi indile ouministeli welongo opo u twale okaana kange kofikola ina omuhandjo opo a ka dule okukala a kadi popepi nofikola shaashi oshili eshongo linene kuye okukala ta ende eendjiladiledile,” Micheal ta ti.
Okwa ti nonande okaana kaye ka pewa okatemba eshi otashi ka kala eshongo linene pefimbo lodula shaashi Micheal ita ka dula okukala ta longifa okatemba kaye pefimbo lodula.
Okwa weda po ta ti Micheal okwa pumbwa eembulukweya dile dokukala ta djala ngeenge teli koko medu shaashi oha ninga oipute ngeenge ina djala ombulukweya dile.