Pinehas Nakaziko

WINDHOEK-Maria Lisa Immanuel, a tseyika nawa nedhina ML osho a ulike ohole kuNamibia alihe sho a li a pititha oalbuma ye ontiyali yanunimwa esiku lyemanguluko.
Oalbuma ndjika yedhina Esiku Lyemanguluko, oya piti mEtine (Maalitsa 21) komapandja gwointaneta, naangoka haga landitha oongalo tashi pitile kointaneta.  “
Onda kambadhala oku eta po oalbuma ndjoka tayi tsu kumwe noongalo ndhoka handi imbi, tadhi popi kompinga yemanguluko nonakuyiwa,” ML ta ti ngaaka.
ML okwa ti okwa hala oalbuma ndjika yi tume etumwalaka kukehe ngoka te ke yi pulakena. 
“Oalbuma ndjika oya nunimwa esiku lyemanguluko otayi tu dhimbulukitha opo tu kale tatu longo nuudhiginini, nelalakano opo tu tunge oshilongo shetu Namibia,” ML ta gwedhapo ngaaka.
Moalbuma muka oku li a kwathelwa okwiimba kuMiss Rose, Mabuzza, naHouse Guru Gang oku tumbulapo ashike yamwepo. ,
ML okwa li ishewe a imbi pamwe naVikta Juiceboy, oku etapo ongalo ndjoka yedhina These Beats, ndjoka ya kala tayi dhana onkandangala oomwedhi ndatu dha pita. 
Oalbuma ndjoka Esiku Lyemanguluko  oyi li yi na omaimbilo ngoka taga pulakenwa konyala kaantu ayehe, okuza kongalo yotango moalbuma sigo oyahugunina. Oyendji oya kala nokupewa mo moongalo ndhoka tadhi ka kala moalbuma muka, ndhoka kwa li dha pitithwa okuza ehulilo lyomuvo gwa zi ko ngaashi Cassinga, Independence Day, osho woo Hardworking Woman.
ML oku li omuhikingalo ngoka e na ohokwe yoongalo, nokwa hala oku ulika oshitalenti she pamwe nAanamibia ayehe, osho wo aahikingalo mboka ya za pondje yoshilongo. 
Okuza nkene a li a pititha oalbuma ye yotango yedhina The Diplomat, ML okwa kala nokupita miikundaneki yomuuyuni ngaashi Afrika Muzik Magazine, Moto Moto, noongalo dhe odha kala nokudhana koBreeze FM yaNamibia ethimbo olindji. 
Oalbuma oyil i ya pita nale koDonlu Africa, iTunes, Youtube, nuuCD otawu ka pita pehulilo lyomwedhi nguka.