WINDHOEK – Uuministeli wuuhaku nonkalonawa owa eta po omuti omupe gwedhina Dolutegravir gwaantu ye li kepango lyoHIV.
Dolutegravir oludhi olutiyali lwomiti dhoHIV integrase strand transfer inhibitor (INSTI) ndhoka hadhi lwitha nokudhengela poshi ombuto yoHIV-1.
Sho a li ta popi pepatululo lyoshiluku oshitihamano shoNational Antiretroviral Therapy (ART) omugandji-mayele omukuluntu muuhaku wombuto yoHIV noyoTuberculosis, Dr Ndapewa Hamunime okwa fatulula kutya omiti omipe otadhi ka ya pehala lyoEfavirenz, ndjoka oyo paife hayi pewa aavu yoHIV.
Ta ti aanuuvu oyendji yoHIV moNamibia oye li kepango lyonkatu yotango ndjoka hayi gandja owala opela yimwe yi na otenofovir-lamivudine-dolutegravir, ndjoka ya talika ko kutya ohayi longo nawa noonkondo mokudhengela pohi eindjipalo lyombuto molutu lwomuntu no inayi mu etela naana iilanduli.
“Otatu ka tsikila ngaa naantu aashona taya ka kala kepango ndjoka ekulu ndjoka lyEfavirenz pehala lyoDolutegravir oshoka otashi vulika omalutu gaantu yamwe ga ka kale itaaga tambula ko omuti ngoka omupe, omolwa omatompelo gontumba.
Hamunime ta fatulula kutya epango lyoHIV nkene lya kala ohali lunduluka ethimbo nethimbo omolwa omalunduluko gopaunongononi nehumokomeho ndjoka hali tambulwa ko wo kehangano lyuundjolowele muuyuni lyoWorld Health Organisation.
Okwa holola kutya Namibia oku na aantu ye vulithe po200 0000 mboka ya monika ye na ombuto yoHIV. Aantu ye li 11 000 yomuyo aanona, nayalwe oye li 185 000. Ta ti aanona naakuluntu oyendji oye li kepango.
“Nonando sigo oompaka otatu longo nawa kombinga yokulwitha omukithi, onkene twa pumbwa okutsikila okulwitha etaambathano nenge egandjo lyomukithi kaantu aape. Otu shi shi kutya itatu vulu okukomba ko oHIV kombanda yevi, ashike ngele ombuto oya kala ya thindilwa pohi momalutu gaamboka ya kwatwa nale, nena itaya vulu oku yi gandja kaantu yalwe,” ta fatulula.
-Nampa