New Era Newspaper

Tafel3
Icon Collap
...
Home / MoKhomas nErongo omo tamu tunhilwa tete

MoKhomas nErongo omo tamu tunhilwa tete

2021-03-18  Festus Hamalwa

MoKhomas nErongo omo tamu tunhilwa tete
Top of a Page

Eshi omuti wokutunhila omukifi woCovid-19 wa fika moNamibia, ominista yOukolele Dr Kalumbi Shangula oya ti oitukulwa yaKhomas nErongo oyo tai ka tunhilwa tete moshilongo.

Shangula eshi okwe shi popya mEtivali pefimbo a tambula ko omuti wokukeelela oCovid-19, eshi wa fika lwoshikando shotete moNamibia okudja koChina. Okwa ti otashi kwafele ngeenge ovanhu veedula okudja po18 fiyo 59 otava tunhilwa tete opo ve liamene kombuto yCovid-19.

Minista okwa ti etunhilo otali tameke Etine loshivike eshi, onghee okwa popya nondjungu kutya ouministeli waye owe lilongekida opo u longe noudiinini okutunhila oshiwana.

Minista okwa ti yoo ovanashilonga voministeli youkolele ovo va teelelwa okukala va tunilwa tete. Okwa hokolola kutya ovanashilonga voministeli youkolele ova pumbwa okutunilwa tete shaashi opo ova kale va mangululwa diva va ka yandje eyakulo koipangelo ngaashi tashi dulika.

Yee ta yelifa kutya elalakano lokutunila ovashilonga vomoministeli youkolele omolwaashi ovanashilonga ava ova pumbiwa okukala va amenwa ngeenge ve li moipangelo shaashi ohava longo novanaudu va kwatwa kombuto ei, onghee ngeenge ova tunhilwa tete otashi shunifa omhito pedu opo vaha kale va kwatwa kombuto eshi ve li moilonga.

Kepulo kutya omolwashike ovanhu veedula 18 fiyo 59 ve na okukala va tunhilwa tete, ota ti kutya okwa didilikwa ovanhu veedula odo ovo tava fi unene kombuto yoCovid-19. Naashi nee osha eta omadilaadilo opo ovanhu veedula odo va kale va tunilwa tete. 

Minista okwa yelifa kutya ovanhu ava ve na eedula 18 fiyo 59 ovo vamwe ava va kwatwa kombuto ei unene. Onghee okwa kunghulila Ovanamibia ava ve na eedula 18 fiyo 59 opo va kale va ka tunhilwa.

Shangula okwa ti ovanhu ava ve li kepango lopaunamiti lomikifi dikwao da wedwa po navo otava ka tunhilwa shaashi navo ove li meshongo lakula lokukwatwa kombuto.

Okwa kunghulila Ovanamibia opo va xulife po okupukifa oshiwana okuyandja ouyelele woipupulu kombinga yoCovid-19, yee ta ti nava twikile nokuluufa komalombwelo nokeemhango doCovid-19.


2021-03-18  Festus Hamalwa

Share on social media
Bottom of a page