Ehangano loshikonga shokukondjifa omahepeko oukashikekookanhu loMonica Gender Equality, Human Rights and Social Justice ola tota po opoloyeka yokulonga oipundi, oitaafula neenghaku nosho tuu oinima ya yooloka hai dulu okulongwa keenyala.
Opoloyeka oya totwa nelalakano lokuyandja eemhito doilonga kovanyasha veli momhumbwe yoilonga.
Oinima tai kala tai longwa mopoloyeka omu otai kala tai landifwa kovanyasha opo oshimaliwa shi longifwe okuvatela ovanafikola veli momhumbwe yoshimaliwa shokufuta ofikola, ovanafikola ve li momhumbwe yomudjalofikola, ovakulupe novanhu ve na oulema va pumbwa oikulya.
Edi oda popiwa komupopiliko wehangano loshikonga shokukondjifa omahepeko oukashike kookanhu lo
Monica Gender Equality Shaanika Nashilongo eshi a hokolola ta ti elalakano lopoloyeka ei okukondjifa ondjala noluhepo moshilongo.
Okwa ti ovanyasha oveshe ova manguluka okukala tava kufa ombinga mopoloyeka ei opo va dule okulimonena oiyuuyemo.
Nashilonga okwa kunghulila ovanyasha opo va longe nondjungu nokukala tava longele kumwe okutopolelafana ounongo, vo va dule okushipondola mopoloyeka yavo.
“Onda didilika ovanyasha vahapu veli momhumbwe yoilonga eshi hava kala veli momaumbo ve ena eshi tava ningi, omanga vamwe ohava kala tava longo oilonga yoimbuluma ngaashi okukala tava vake po omaliko ovanhu,” Nashilongo ta ti.
Nashilongo okwa ti opoloyeka ei otai kalundulula onghalo yovanyasha vahapu moshilongo.
Okwa ti otai indile ovanangeshefa, ovaleli vopapolitika opo veu ye okuyambidida opoloyeka ei noshimaliwa shokukalanda oilongifo.
Okwa ti ehangano lavo onghee ngaa natango tali twikile okulalakanena okuxulifa po omahepeko oukashike kookanhu, nokukwashipaleka kutya oufemba womunhu keshe owa fimanekwa.
Okwa ti ku keshe ou te kelihanga eli monghalo yokuhepekwa na kale a lopotela ombelewa yavo konomola yongodi ei 0812222077 ile oshiwana shi kale sha lopotela opolifi opo omahepeko oukashike kookanhu a kale axula po.
– fhamalwa@nepc.com.na
Shaanika Nashilongo omupopiliko wehangano loshikonga shoMonica Gender Equality Human Rights and Social Justice.