Mbongarero zanavenye moune una puko kavaliharere vene navene nosirongo sikare nawa, omu kavalirekerere nokuliharera vene vahameni ava wombongarero zountambali ava vatameka nosirugana sawo mokwedi kwaSeptember mvhura zeezi.
Mbongarero zanavenye kwakere asi ngano tazipata mo 25 November, nye nampili ngoso, morwa kwakere nye noyihuyungwa yoyinzi pelikwamo, yavaninkisa nye asi twahepa kugwedererako mazuva ndi asi sivike simwe yipo tumane nayinye yina kara pelikwamo hawe dogoro vayisikisamo.
Mokukava nombudi dawo awo kavatere nye omu vazumbanesa nomwenyo dovantu rambangako novakwawo vamwe womombongarero zanavenye morwa mukisi ogiu goCoriona.
Kwedi kakupwireko kavazumbanesere munekuto Iginatius Nkotongo Shixwameni ogu kadogorokere poopo kaligende age mosigongi sombongarero sonokomitiye.
Twahalidivara asi kazikere mvhura zondigu kwetweni natuvenye.
Nomiliyuna dovantu twazumbanesa rambangako nomumembo lyetu eli atupongere.
Ngomukarelipo gombunga zaSWAPO, zina kara kepangero, mokukwateramo epangero ntani mbunga zetu zina kupangera, ame kuna kugava ruguwo rwange kovakwetu owo vatusiga.
Nomwenyo dawo dipwizumuke nombili, yimo ana kutanta mukurona gwaSWAPO mombongarero zanavenye,Hamunyera Hambyuka.
‘’ Kilikimisa zongwa kwetweni natuvenye ntani kuna kumuharera mvhura zompe zongwa zo 2022. Yimo ngoso ana kugwedako.
Ose ngesi tuna siki nye kehagero lyosinema setu somvhura ezi 2021.mousili, kapi zina kara mvhura zongwa.
Mvhura zomaudigu, ose kuna zumbanesa vakwetu wovanzi unene, yimo ngoso ana kutanta muhuyungilipo gono gombongarero zanavenye, Loide Kasingo.
Mosiruwo esi sepongo lyombongarero zanaveye zountambali, awo kwaliyongamo mokupulisira veta zoyimaliwa, ewapukururo lyoveta zoyimaliwa ntani zomutero.
Noveta mbali kwadigusapo posiruwo tupu oso ado vana ditura pelikwamo.
Ntani awo kwaliyonga momune norport unene dokomitiye zakarerapo unankondo wawo, omu varetesapo vahameni vawo vavali vaze kokomitiye ozo kumwe nokukatara asi yirugana yaw okapi yina wapa awo kuna kara Hon Bernadus Swaartbooi ntani Hon Henny Seibeb omu vahere kuzonagwisa sihuyungwa saPresidente Hage Geingob mokuhuyungisa muhoko kiupitira mombongarero zanavenye. Tupu gamene ngano atameke kulimburura mapuro, gokutunda konombunga mpatanesi.
Apa nye vana kumusindikira pwagemo Swartbooi, simpe tazuguma mpango ezi zakara asi siodivi sononkondo sombongarero zanavenye. Siruwo sooso munona gwendi Henny Seibeb, tatameke kutavagura mbapira zoHarambee zauvali kumwe nokuziziguma komeho zosipundi saPresidente.
Seibeb kwamuvaterere nye kumugusamo vaporosi omu vamudamwine vapwagesa ponze zevango lina ava pongere, vaporosi kwayirugene eyi mokukwamo manangwire gaKatjavivi asi vantu ava vavali vapwagemo.
Eyi hena yamuninkisire gomugendesi ahagekese epongo lina. Mukarelip gwaRDP Mike Kavekotora kwatente asi ogwina kapisi mukaro gomuwa, awo hena kapi vana kuyipulisira yangesi.
Koruha ronokmomitiye, nokomitiye dononzi kwarugana omu vakara nomapuragero gokulisiga siga kovarugani vemepangero ntani nombunga dopaumwene kukwama kweyi vagwana yina kutunda mombongarero zanavenye.
Komitiye zo natural resources kwarugana mapuragero gokuhamena kampani zaReacon Africa monomukunda ngwendi kavango zoupumezuva ntani Kavango zoutokero.
Ano ezi zosinka yogender, kwaza konomukunda ngwendi Erongo, Omaheke, //Karas, Haradap, Otjozondjupa, Oshikoto ntani Oshana.
Awo kwarugana mapuragero kweyi vagwana yokutanta asi eliguso mazimo vayitura yikare veta moNamibia nokuwapukurura veta zina zakarapo zomo 1975, veta ntokorwa zauvali.
Morwa kukara nye nelikwamo lina kwata moyitji, awo kwarugana unene mapuragero gangesi mosikondo vike. Eyi kwayirugene asi vahepa hena vantu owo kukara mepongo lyawo lyenene, nokukara moyigongi yankenye ezuva.
Epongo lyawo lyomvhura ozo ngalikarako mo 8 Murongankuru 2022.