New Era Newspaper

New Era Epaper
Icon Collap
...
Home / MTC a gandja N$20 000 kosikola yoothigwa

MTC a gandja N$20 000 kosikola yoothigwa

2019-03-01  Staff Report 2

MTC a gandja N$20 000 kosikola yoothigwa

Victoria Kaapanada 

OSHAKATI - Aanilonga yaMTC,  kohi yoshikonga tashi ithanwa  MTC Employees Care Iniative, oya li ya inyengitha omitima dhawo sho ya kwathele osikola yothiigwa, aanulema oshowo uunona tawu lumbu nomukithi gwoHiv/Aids posikola Roland Grebner NGO-ERC PDW.

Osikola ndjoka hayi tonatele aanuulema, oothigwa oshowo uunona wa humbata ombuto noku ya sila oshimpwiyu oshowo okuya pa enongelo, otayi adhika momukunda Epumbu mOshigandjohogololo shaElim.

Omugandjimulombo nomupopiliko gwoMTC Johannes Ekongo okwa li a lombwele oshifonkundaneki shino kutya yo onge aanilonga yoMTC oya li ya tula uukuni kumwe opo ya kwathele nokashona hoka ya mono po, ya tsikile etungo ndyoka lya li lya kungululwa po komvula omvula ya zi ko oshowo okukwathela uunona mboka naashoka ya pumbwa.

Amushanga gwosikola ndjika Salmi Petrus okwa ti osikola oya totwa po mo  2013 komukokoli oshowo omukuluntusikola  Ruusa Mpingana Nashima ngoka a lukile Omundowishi gwedhina Roland Grebner ngoka oye ha kwatha unene osikola ndjoka ngele tashi ya koompumbwe dhayo.  

Petrus ta ti okuuvite enyanyu enene, oku wete a fa eli mokilisimesa nale oshoka sho ya longelwa kaanilonga yaMTC oshinene, nosha nyenga oyendji oku shi ninga.

“Iimaliwa mbyoka twa pewa otatu ke yi longitha okushunako iipeleki yetu mbyoka ya pepwa ko kombepo nokutungululitha mpoka pwa teyagulwa. Nonando tu na oompumbwe odhindji, omashina gokudhewula aanuulema, omizalo iikulya, okutunga ongandjo yosikola niikwawo oyindji, otatu indile ngaa kehe ngoka ta vulu oku tu yambidhidha, e tu kwathele nokashona hoka e na po”. Petrus ta ti ngaaka.

Ta gwedha po ta ti osikola ndjoka oyi na uunona wuukiintu oshowo wulumentu ,wa konda 15 nohawu zi momuhandjo, omanga uunona wu thike 60 ohawu zi komagumbo. Mboka wu li momihandjo oomboka hawu zi kiitopolwa yokokule.
Petrus okwa li a kumagidha aakuluntu moshilongo ashihe kutya ngele owu na okanona ke na uulema kambadhala wu kale we ka fala kosikola yawo ka ka mone elongo oshowo omadhewo ngoka taka vulu okumona shi vulithe ka kalekwa momagumbo.

“Uunona mboka owu na onkalamwenyo yi li komeho gawo, notayi vulu okulongekidhwa nawa ngele tawu mono omakwatho oshowo uunongo. Uunona wumwe ohawu vulu okulunduluka ngele wa mono omakwatho ngoka wa pumbwa”. Petrus ta ti ngaaka.

Ta ti posikola yawo kape na olusheno nohaya longo nuudhigu lela unene ngele kwa toko ngele tashi ya unene koku ya telekela. Osikola ndjika oyi na aalongi ye li yaali ashike, nonando ya pumbwa ye vulithe po mpoka oshimaliwa inashi gwana.


2019-03-01  Staff Report 2

Tags: Oshana
Share on social media