Victoria Kaapanda 

Ehangano lyokukwatakanitha omawi mombepo MTC olya eta po omukalo gokushangitha uukalata woonomola komadhina gooyene. Omukuluntu gwehangano lyo-MTC Tim Ekandjo okwa ti omayishangitho ngoka otaga yi sigo omumvo tagu ya muJanuali.

“Shika otatu shi ningi omolwomakengelelo gaafuthi uuna taya longitha omukalo gopangodhi okuyuga oshigwana iimaliwa nosho tuu,” ta fatulula ngaaka. Ekandjo ta ti, ota indile oshigwana opo shi longithe ethimbo ndika, okunyolitha uukalata wawo, opo kehe gumwe a kale e na okakalata ke na omaukwatya ge.

Omayishangitho ngoka okwa li ga tameke omwedhi gwa yi, nokwa tengenekwa ookasitoma dhehangano ndika dhi vule poomilliona mbali dhi kale dha ishangitha.

“Otwa longekidha ethimbo ndika tango lyi longithwe omanga ndyoka tali ka dhengela inaali thikana mu Januali omumvo tagu ya,” ta popi ngaaka. Ekandjo ta ti, omayishangitho oge li momahala gaMTC oshilongo ashike, miitopolwa ayihe 14.

Omayishangitho ngoka otaga ningwa oshali itaapa pulwa nando ondando yoshimaliwa. Ta gwedha po kutya natango otaga ka kala momahala gomauliko giipindi ga yooloka, tagaka holoka. “Kehe ngoka taka thika, na kale a faalela ongondhi ye yopeke, okamutse koshilongo, ombaapila tayi ulike mpoka ho zi lela oshowo ombapila okuza kopolisi tayi kwashilipaleke kutya okakalata hoka okoye,” ta fatulula ngaaka.

Selma Andreas a yambukile momukunda Etilyasa moshitopolwa shaMusati okwa ti, ke na nando ontseyo ngele uukalata woongonhi otau shangithwa komadhina gooyene. “Shika osha pumbwa okutaandelekithwa miikundaneki ayihe oshowo okupitila kookansela nooyene yomikunda ya thikithe etumwalaka uuna taya ningi iigongi,” ta ti ngaaka. Andreas okwa tsu kumwe nonkatu ndjika ya kuthwa kuMTC, oshoka ope na aafuthi haya longitha oonomola kaadhi shiwike nohashi kala oshidhigu oku ya landula.

Ta ti, shika otashi ka kala oshipu okumona nenge okulandula onomola ya longa omiyonena.

– vkaapanda@nepc.com.na