New Era Newspaper

New Era Epaper
Icon Collap
...
Home / Mutorwa a kunghilila oshiwana kombinga yokatoo

Mutorwa a kunghilila oshiwana kombinga yokatoo

2022-10-18  Festus Hamalwa

Mutorwa a kunghilila oshiwana kombinga yokatoo

Mininsta woilonga noyeendifo John Mutorwa okwa kunghilila oshiwana opo shi kale sha kotoka ngeenge tashi ka konga omayakulo keembelewa doNATIS opo shiha ninge oihakanwa yokutulwa mokaatoo.

Minista okwa ti ope na ovanhu vamwe ve li ninga okaalyamupombo eshi hava kala tava tula ovanhu mokatoo kutya ohava landifa omikunda doshinga.

Onghee okwa yelifa ta ti omayakulo aNatis oha yandjwa keembelewa davo kovanailonga ovo hava longo meembelewa ndele iha yandjwa kovanailongo wokondje.

“Omatifutilo oimaliwa omayakulo aNatis ayeshe oha futilwa keembelewa detu onghee oshiwana nashi li kaleke kokule nokutumina ovanhu oshimaliwa keengodi davo ngeenge tava pula omayakulo,” Mutorwa ta ti.

Edi minista okwe di popya kepatululo pambelewa nombelewa yoNATIS ya patuluka modoolopa yaHelao Nafidi Omaandaxa.

Okwa ti ku keshe ou ta ka monika ta longifa oulingilingi ota ka pewa e handukilo lopaveta shaashi ombelewa yaye ita ka popila omunhu ta longifa oumbudi okukengela oshiwana.

Mutorwa okwa ti ouministeli waye otau lalakanene okuyadja omayakulo kOvanamibia aveshe ngaaashi eendjila doshinanena noshoyo oku eta omayakulo aNatis popepi noshiwana shi ha ende vali eendjiladiledile tashi i keembelewa dokokule. “Okwavashiwana nava kale tava longifa ombelewa ei okupewa omayakulo a yooloka. Ovanailonga nava kale tava longele kumwe novakwashiwana mokuyandja omayakulo mawa,” Mutorwa ta ti.

Ombelewa yoNATIS otai kala tai yandje omayakulo ngaashi okushangifa eetuwa ile okufendela noshoyo okuyandja omukunda wotete ngeenge omunhu a hala okukakonga omukanda wokushinga.

Moshipopiwa shaye Mayola wodoolopa Helao Nafidi Darius Shaalukeni okwa ti ombelewe ei otai ka lundulula eenghalamweno dovakwashiwana hava di komikunda da yooloka shaashi otava ka mona omhito yokukala va pewa omayakulo aNatis.

“Ei oyo omhito iwa koshiwana opo shi kale e uya okukonga omayakulo oo sha pumbwa onghee oshiwana otashi ka enda vali eendjiladiledile.

Eshi a popya naKundana Mateus Shilongo okwa lombwela Kundana ta ti okwa kala shito oha ende oshinano shile okudja komukunda Onengali ta ka konga omayakulo koNATIS yokEenhana.

“Ohatu kala tuna omashongo olefa yokuya kEenhana ashike paife otwa pandula ouministeli woyeendifo ei we twetela ombelewa popepi,” Shilongo ta ti.

fhmalwa@nepc.com.na


2022-10-18  Festus Hamalwa

Share on social media