Muzamaisi swalelele wakampani ya Namibia Drydock and Ship Repair, Heritha Nankole Muyoba, natimezi mwakozi yafamukwakwa mabapa ni Kongola mwasikiliti sa Zambezi Labulalu kakusasana. Nana ni lilimo zemashumi aketalizoho kazepeli. Kozi hape nebituzi babane ili limembala zalubasi lwa hae, mapokola nebanyatezi. Muetapili wamasheleñi mwakampani ya Namdoc, Dries van Zyl nanitifalize lifu lahae. Kukulubelwa kuli Muyoba nalibile kwa Walvis Bay motikala yahae yamufuta waToyota Landcruiser SUV haipazuha liwili lakwamulaho lanzohoto. Mukwaezi kihalatehelwa kamaiso mi motikala yapindumuka hañatañata.

Bababeli ili mukwaezi ili mwanahae, ni mwana kezalahae wamusizana walilimo zelishumi kazepeli, nebaholofezi hainyani. Muzamaisi swalelele wasipokola mwasikiliti sa Zambezi, Nehemia Joseph naize taba yakutisa mafu, kapa kukwaeza kamafosisa nebihilwe. Lipatisiso lizwelapili. Muyoba ubelekile katata mwakulwanisa Covid-19, mi Namdoc neyahezi babeleki bayona nikulifela sibaka satibelelo samimbeta ye18, kubaba akalezwa kuba nibutuku. Nabelikile mwatutengo twakamaiso hamoho cwalo ni katengo kaAir Namibia. Hana bulela ni New Era muzamaisi wazamakete mwasikiliti sa Erongo, Anna Jonas naize Muyoba nabelekile hande hahulu ni likolo la makete. “Neli mulikani yomunde walikolo mi nabapalile kalulo yabutokwa, sihulu mwakulwanisa Covid-19. Nali mwasikwata saluna sabababona zaputako, ili mone lukopana kakweli. Luabezwi hahulu kwazibo yahae yabueteleli. Babeleki balipatela zaluna hane baimezwi kakubeleka lihola zetelele, Muyoba naliteñi kubafa lituso. Tuso yahae nesi yamwa Walvis Bay feela, kono sikiliti kaufela, kakuli yena ni sikwata sa Namdoc nebapatehile kunyatisisa libaka zeñwi mwasikiliti zetokwa tuso. Luswabisizwe hahulu kilatehelo yetuna ye,” nabulezi kamaswabi. Muuna walipisinisi Johny Doeseb uhupula Muyoba kuba mutu yana ikokobeza. “Lulatehezwi kimueteleli yana zibahala mwasicaba saluna, yana yemela liswanelo zabanana ni basali mwanaha Namibia. Kilatehelo yetuna hahulu kuluna kaufela,” nabulezi.